ياماجد ابن حمود يمنى بها اللين = مدّه لاجيب الخارمه والمطمّه
يمنى بها ظل الضعوف المساكين = أبوه يدعي لك قبل تدعي أمّه

قولوا لبقعاء ابشري يالحبيبه = الطيب ورث وارث الطيب ياتي
عرق الندا يندى ولو طال غيبه = والتين يطرح تين طبع النباتي
لاضاقت الدنيا وشفت الغليبه = مركاي ماجد طير حر الفراتي

يمّه دخيلك اطلبي الرب وارجيه = وقت السحر ثم ارفعي الكف عالي
قولي عسى الله في حياته يهنيه = ويبعده عن درب الشقى والهوالي
يمّه معي قولي عسى الرب يحميه = ذاك الذي قدّر ضروفي وحالي

سويت شي(ن) مايسويه صاحي = اشتلت حمل(ن) ماتشيله سلاطين
وقفت ند(ن) للمهب والرياحي = حاربت من شان الكسيرة ملايين
عاونت من زادت عليها الجراحي = وانقذتها من ظلم ناس(ن) قريبين
يوم اشتكت لك ياعريض الجناحي = بين العساكر والجنود الميامين
عامين تصرخ : اطلقوا لي صراحي = ضحية(ن) ياناس بين المساجين
محرومة(ن) صدري من الغبن فاحي = اعيال زوجي في حقوقي معيين
صبوحها عامين سم(ن) ذحاحي = وغبوقها من ظلم الأقراب غسلين
ويوم انتخت بك يالعديم الفلاحي = عز الله انك مزبن(ن) للمساكين
وردّتها جم الزلال القراحي = نصرتها على نجوع(ن) معادين
شمخت وتمثال الجرانيت طاحي = بيدك هدمت أسوار روما وبرلين
كعمت اهل الظلم وناس(ن) شحاحي = ثلمت في سيفك رقاب الشياطين
خيط الصبح بعيونها الشعث لاحي = بدت تباشير الفرح وابعد البين
تدعيلك الحرمه بليل وصباحي = وتطريك يابن عبيد وسط الدواوين
تفخربك الديرة بكل النواحي = لانك الشيهان وربعك شياهين
ماهي غريبه من زبنك استراحي = بقعاء من الماضي زبون المخلين
عادتنا لجل الرفاقه سماحي = سمحين بوجيه النديين سمحين
واللي زبنّا من بعيد الفياحي = كنه زبن ضلع الرعيله ونقبين
اندلله ونعامله بنشراحي = ناقف معه في ساعة العسر واللين
ندراه عن هرج اللغط والمزاحي = ومرجّحين(ن) كفّته بالموازين
واللي نوانا نذعره بالسلاحي = سواعد(ن) على المطافيق عسرين
نحمي الحمى بالمارتي والرماحي = من شرقي غبيّه ليا الجرب والقين
ربعي بعيدين النظر والمشاحي = لطاّمة الصايل صعوط المجانين
كساّبة الناموس درع ووشاحي = اهل السخاء اهل النخل والبساتين
والاّ أنا ياحمود شاعر سياحي = امدح هل الطولات والعدل والدين
أنا على قدي ولالي صلاحي = انقش على المسحوب خمسه وعشرين

مندوب عندي لك كلام = بيوت(ن) مرتبها أديب
ابيك تاخذلي سلام = للعاصمة قبل المغيب
اكفخ على الموتر جهام = واقطع دباديب وشعيب
حتى تجي نسل الكرام = وعطني علومه يانديب
دق التحيه باحترام = لاجيت ابو حمود النقيب
الضابط الشهم الهمام = يوم الملاقى مايغيب
ابن اللوى دار الكرام = جدّه اميره والخطيب
سلايل عبيد الاِمام = راع النخل راع القليب
ان جيته بوقت الدوام = تلقاه بالمكتب منيب
اكرم من مزون الغمام = مدهال حتى للغريب
وان جيت بيته ياسلام = تلقى النجر يقنب قنيب
وصحون وطليان وسنام = وكيف(ن) وفنجال(ن) وطيب
ورْجال وشيبان(ن) حشام = وسوالف وصدر(ن) رحيب
يالله عسى ماجد تمام = ويبقى على راس الرقيب
يقوله السيف الحسام = ومما عطاه الله يجيب
حنّا مقابيس الظلام = وحنّا مدللة الصحيب
اليا ارتكينا مانضام = واللي تحدانا يشيب
وختامها أوفى سلام = للضابط القرم النقيب