سلام تسليمة وفا ياأهل النقا اللي مستديم=اللي صدى بصماتهم تبقى على موالها
سلام ياكل الرجال اللي لهم وصفن عديم =حرار قومن ربت بطيب الفعول اعيالها
سلام يابن فهيد يالنادر ويانسل الكريم=ياللي تحل المشكلات ادقاقها وجلالها
راعي معاميلن عطاها حقها بوقتن قديم=ومازال فعله لين وقت اليوم في منوالها
يشيل حملن مايشيله غير رجالن عظيم=شيال هم اهله وناسه والعرب في حالها
سلام يافيحان بن هذال يالفعل المقيم=إعداد مزنن لاح براقه وخلت اخيالها
من عالية نجد المسمى جيتك أزمه زميم=علمن بصدرن عارف المطلاع من مدخالها
امذربه عن راعي القالات والرأي الغشيم=متوجهن يمك ونفسي حاشمن منزالها
جيتك وأنا طامح بعد ماصرت من وقتي امضيم=في جاهة اللي مايخيب اللي نزل في جالها
سلسلت طيبن وارثه لعيالك بعرفن سليم=حتى مشوا بنهج الجدود امسندين أشبالها
وسعوا لفعل الطيبه حيث الكريم ابن الكريم=يسعى لفعل جدوده اللي طابقت لأقوالها
أنته من عيال أخو هملا راعي الصيت المقيم=فعله غني عن مدحنا بقصارها وطوالها
ماأشكي همومي غير للي كل شين به عليم=ربن يعرف الخافيه ويحل ذنب رجالها
ولاباح سدي يوم وقتي مودعن قلبي سقيم=ألا لراع الوافيات أعدها وأبرالها
أعدها من عرفنا لك يوم لك فكرن حكيم=ماخفت شمتك عارفن طبع الشيوخ وفالها
وقتي حداني يمة أقصايه وعن غيرك يشيم=تنامت أسباب الهموم اللي سرا جمالها
ودورت بيبان المراجل وأدعي الرب الرحيم=ولقيتها قدمي تصك أبوابها بأقفالها
وقالوا لي ابحث عن فريد الوصف رجالن عديم=شيخن يعدل المايله والكايده يرقى لها
نسل الرجال اللي على درب المعالي تستقيم=يمكن تفوز بفزعته وأمثالها وأمثالها
وطرا علي اللي على العليا له العزم الصميم=اللي على الطاله عسف نفسه وحط إرحالها
والعلم يمك ياطلال الوقت في وجهي كظيم=وأنا امتيقن من وفا اللي كل ذربه طالها
أبغى الجماله من كريمن يملك القلب الحميم=وأطمع بخوتكم عساني أستحق أسعى لها
وجمالة اللي مثلكم كالقايده في جول ريم=أكبر شرف للي تبعها لين جا مشتالها