لوما يوسع خاطري كل فاقات=كيفٍ يسوى وسط صبح الدلالي
يشرى له البن الخضر بالريالات=لو وزنتة تاصل ثنعشر ريالـي
فنجالها يبري الكبـود العليـلات=يرهى عليه الهيل لو كان غالـي
قلته وانا مبـداي قنـة ملاحـات=في راس مرقابٍ بديتـه لحالـي
ما حولي الا المندهه والعضيـلات=ولا جاء من الاجواد كود الجمالي
اعذل عيونٍ هلت الدمع غـزرات=تهل دمعٍ مثل وبـل الخيالـي
ابكي على ربعي بعد راحو اشتات=احدٍ يمن واحدٍ نـزل بالشمالـي
واحدٍ نزل في السوق فيه الغيارات=في منزلٍ ما هو لنا راس مالـي
لاواه يا ربعي عـوارف وعيـات=يوم كـلٍ عـن عزاتـه يسالـي
ربعي منازلهم رقايـب وديمـات=بين الحفير وبين وادي الضلالـي
والهم على لطم المعادين عـادات=يوم اللقاء ما دارقوا في السبالـي
يالموت ما شاورتني قبل من مات=واعطيك ما يرضيك في كل حالي
اعطيـك خبـلٍ نقمةٍ للقرابـات=ما ينحزم به مثل جرفٍ هيالـي
تكفى يا خو حمسا زبون الحنيات=زبن الرفيق اليا حدتـه الليالـي