الليله المعنى خطير وخاطري جوفه كلام=ودي أقوله بس أخاف يقوم عج المعركه
ماخوفتني ميلت الايام في شرقٍ وشام=خايف كلامي لايجي وسطه حروف مفبركه
لن الزمن هذا خطير ولابقى فيه انتظام=وكم راس شيخن راح عقب العز في وسط شركه
على العموم الصدق مامثله على البيدا حزام=دام الحقايق في صدور أهل الهروج مشبكه
هذا الزمن رحنا ضحيه من ضحايا الانقسام=واعلامنا رغم التواجد صار مافيه بركه
هذا الزمن قل الادب وانشل معنى الاحترام=والي تفاخربه جدود العرب صرنا نتركه
هذا الزمن صرنا ندور من هل المنكر سلام=وحنا منول من يعادينا خشيمه نفركه
راحت فلسطين الجريحه من قبل ستين عام=وراحت بلاد الرافدين وكلنا ماش حركه
أستهدفونا الغرب وأغرونا بتطبيق الحرام=لين الشباب أمسوا ثلاث أرباع وسط التهلكه
الي يطبل للولد والي يغني للمدام=والي يشكشك في زمانن مايعرف الشكشكه
والي يدافع عن حقوق البنت يامال العسام=لو أن ماله من حقوق البنت غير الجمركه
وضعن خطير ولاعلى المسكين والضايع ملام=اللوم يلحق من يشوف الدم غيره يسفكه
يا أمة الأسلام دام يدينكم تقوى اللجام=مافيه داعي للمذله من يهودن مشركه
تكاتفوا ثم أرجعوا للدين يانسل الحشام=والدين رابط بين كل الناس لازم نشركه
لو كل مسلم في صلاة الفجر جاء خلف الإمام=ماكان شفت الي حصل وإن صار شي(ن) ندركه
ولو كل مسلم طبق الاسلام بأحسن مايرام=ماكان شفت المسلم يفجر فوسط المملكه
ولو كل مسلم لا سمع زله بسيف الحق قام=ماكان شفت الدينمركي يرسم أصور مضحكه
يستهدف محمد عليه أفضل صلاتي والسلام=وحنا نعاين والجفن من ماجرابه نعركه
وقتن يشيب راس منهوا عاش في سن الفطام=ويهل دمع الشايب الي كل حاجه تربكه
لو انها صارت فعهد الراشدين أهل الحسام=ماكان شفت الضعف فينا والجمال مبركه
قاموا على وضح النقاء والنور جلاي الضلام=وجتك الفعول الي مثل حد السيوف المنهكه
لاكنها صارت فعهد الحاكمين أهل الوسام=الي منول لاطغى طاغي تجيه وتهلكه
ياقادة الأمه هل الوقفه ليا حصل الزحام =والله صعبه مجدنا المفقود مره نتركه
ماهي غريبه لو نعيد المجد من بعد العدام=بس الغريبه لأنهزمنا دون جيش ومعركه

المشاركة الأصلية كتبت بواسطة ترركي (المشاركة 795843) اخوي ابراهيم الله يمسيكـ بالخير القصيدة رااااائعة بجد يعني لو أقول لكـ الأبيات اللي أعجبتني راح أكتب القصيدة كلها صراحة (وانا ماأعرفكـ عشان أجاملكـ) صح لسانكـ ملايين بس عندي طلب صغير : انكـ ماتبخل علينا في شعركـ و لاتحرمنا من جديدكـ قل تم :

المشاركة الأصلية كتبت بواسطة معجب العتيبي (المشاركة 795876) الله الله مبدع كعادتك يالزراقي صح لسانك والله ينصر المسلمين شكرا شكرا شكرا لك

المشاركة الأصلية كتبت بواسطة عبدالله الجـــذع (المشاركة 796395) اللهم انصر اخواننا في غزه عاجلا غير اجل قصيده معبره جدا ومشاهد يوميه مؤسفه الف شكر محبك .,

المشاركة الأصلية كتبت بواسطة نمرود الشعر (المشاركة 796675) شكرا على المشاركه تحياتي لك