ياطوب لا تستغـرب ارثيـه ياطـوب=نظرتـك لأحـداث الليالـي قصـيـرة
عن قلبك النايم ضيا النـور محجـوب=للنـاس عنـد النـاس رفقـه وجيـره
الموت حق وللأجـل وقـت مكتـوب=يعلـم بـه الله ماعلـم فـيـه غـيـره
ينعى الشعر فارس مراجل ومحسـوب=علـى عيـون المعرفـة والبصـيـرة
أديـب ومحنـك وعاقـل ومصحـوب=بأفكـار مـن يأخـذ بعضهـا تنـيـره
يعنـي بمـا يعنيـه الابـداع موهـوب=يثـري بمايملـك مـن ابـداع ديــرة
ماسب في حاضر ولاحـش عرقـوب=واللـي يبـي راي السعـد يستشيـره
في صوب وعلوم الردى عنه في صوب=وافـي مـع الوافـي نقـي السريـرة
شهم وكريم اخـلاق ومهـذب اسلـوب=وراسـن صعاطيـر القرامـة تديـرة
وعملاق شعر إليا حضر ماقف ينـوب=عن كل من عنده علـى الشعـر غيـره
صدمة رحيله هزت اوطـان وشعـوب=لانـه خسـارة والخـسـارة كبـيـرة
حتى الشعر في غيبتـه بـات منكـوب=لأقـرب مسافـات التدنـي مصـيـرة
أخذوا عبر ياهل الشعر والعبـر نـوب=يصحى لها الغافـل ويحيـى ضميـره
محبوب حي وفـارق الحـي محبـوب=لأن الصفـات اللـي حواهـا كثـيـره
والشاعر اللي مـن مزايـاه مسلـوب=حـرام مايسـوى ولا ربــع لـيـره
يالله لاتكتـب علـى فيصـل اذنــوب=رحمتـك مـن واهـج جهنـم تجيـرة