ساقتني الاقدار من دار في دار = دار ٍ بها نحيا ودار سنيه
دار ٍ لها فالقلب حشمه ومقدار = ودار ٍ لها فالقلب تسعين كيه
واللي يشوف الحال تنبيه الاسرار = اسرار في وسط الضماير خفيه
اخفيت مابي عن رديين الاشوار = ولا زمان ٍ يشمت اللاش فيه
رضيت بالمقسوم وبحكم الاقدار = وقصرت رجلي عن دروب الخطيه
ياما عذلت النفس عن درب الاوزار = حتى لزمت اخطامها في يديه
اخذت فالدنيا تجارب وتعبار = وعرفت فيها كل حسنه وسيه
تجريبنا الايام والوقت دوار = والعمر يمضي بين روحه وجيه
لكن يالمنصوري اليومه امجار = ماكل شي صار له جاذبيه
اليوم يابو حامد الفكر محتار = والنفس طابت من هوى العامريه
وجدي على خمس ٍ ليا صار ماصار = هي شف بالي من حياة شقيه
الاوله قلب ٍعلى الضيم صبار = لجل الرفيق اللي يدوس الخطيه
ندمح خطاه ولانبا منه معذار = ولا العدو نسقيه كاس المنيه
لابد مايندم وتاتيه الاخبار = بكره و ترميه الليالي عليه
والثانيه ربع ٍاجاويد واخيار = مقعادهم فالنفس له قابليه
يازين مقعدهم على شبة النار = اليا اعتزوا كل ٍينادي خويه
في خايع ماديس من عقب الامطار = ماغير ماطا جيبهم فالثنيه
والثالثه شي من الكيف مختار = مشراه غالي قيس ربع الوقيه
في دلة ٍ يعبالها هيل وابهار = هي منوة اللي يعشق الشاذليه
فنجالها جاب المدايح والاذكار = كنه دوا للراس فالصيدليه
والرابعة نوق مجاهيم وابكار = تسعين من غير الفحل والمطية
مسراحها يشوق وايسر الانظار = ماكنها الا عسكر ٍ في سريه
اشوفها تسوا ثمانين قنطار = امن الذهب في خزنة الصيرفيه
والخامسه سيارة ٍ جيب فكس آر = امواصفاته كلها عالميه
من ديرته تلقى على وجهه اغبار = آخر موديل مورد ٍ فالحويه
لا ضاق صدري ثم اخذت به مشوار = ادله ويسلى خاطري في شويه
ادوج به بين الفيافي والاقفار = ماغير انا والطير والبندقية
هذا طرات الروح ياطير سنجار = ولا الشعر ماعاد لي فيه نيه
من بعد ما صار اله فالسوق تجار = اتبيعه وتشريه صبح وعشيه
لكن ليا جاء للتماثيل بيطار = ماتنطفي ناره مع الوقت حيه

المشاركة الأصلية كتبت بواسطة عبدالله الجـــذع (المشاركة 790490) من ديرته تلقى على وجهه اغبـار آخـر موديـل مـورد ٍ فالحـويـه ابن سرحان قصيده تجلي العماس مبدع وربك الله ماشاء الله عليك الابداع معك اينما كنت راقت لي كثيرا صح فكرك وقلبك محبك .,

المشاركة الأصلية كتبت بواسطة أبو مرحبا (المشاركة 790497) الرائع: ابن سرحان الثبيتي صح الله لسانك يالغالي على القصيده الرائعه .. بيض الله وجهك وماقصرت .. تقبل مروري