ياحبيبي عطني أسباب الغياب = دام باقي للجفا عندي صبر
شاعرك واقف على باب العتاب = ما قدر في دفتره يكتب شطر
المعاني تحتظر والقاف شاب = وأختلط عجز القصايد في الصدر
غيبتك ساقت على القلب العذاب = وأشعلت ليل التوجد والسهر
ماأريد أقول فيك الظن خاب = لن هذا هو موتي والقهر
أنشد النسناس عنك والسحاب = وأنشد الرعاد لا هل المطر
ماخبر للحب عندي غير باب = أنتظرتك جالسن عنده شهر
ألمحك وأعيد وأشوفك سراب = ياربيع القلب مدري يادهر
ليه تسعى للتجافي والخراب= وليه تركز رمح بعدك في النحر
وليه تتركني بلا علم وجواب= وليه تدفع خاطري يم الكدر
صرت أهوجس وأعتلي روس الهضاب = وصرت أفضفض للشواطي والبحر
وصرت أشوف الصبح في لون الغراب = وصرت أشوف الكذب في عيون البشر
أبتدى شمع التلاقي في الذواب = وأشتكى سور الحدايق للزهر
ياحبيبي فيك يامحلى الخضاب = ياشبيه الريم لامنه حضر
لاتحول بسمتك للفين ناب = ولاتغير نور وجهك ياقمر
تدري أن القلب مدميه الصواب = وتدري أن الشيب في رأسي ظهر
أروني نبع الوصل تلقى ثواب = كان تطمع في المثوبه والأجر
وأفتح بوصلك تباشير الكتاب = وأرحم اللي يسهرك حتى الفجر
ياتجيه وتسعده عقب الغياب = أو تخلي صورتك فوق القبر