على قافٍ يثير الخلـق أنـا غنيـت يامسعـود=خذاني حرفك الباكي وزود نزفـك اوجاعـي
خذاني لعالم الموتـى ازاور منقبـر ملحـود=أصافحهم وأعانقهم وأحدثهم عـن أوضاعـي
قضيت الحال في غربة أسافر والليالي سـود=وليا مني نويت ارجـع فقـد آثـاره الساعـي
سنيـن وزايـرٍ قبـره ألمـه لاغـدا مهـدود=أبلل قبره بدمعـي فـي مغّـرابٍ ومطلاعـي
أسجّ رجولي, وقلبي أحطـه عندهـم مفـرود=أغادرهم على هونـي وتفكيـري لمرجاعـي
أسامر ليلي لحالي واشوف اللي كـلاه الـدود=صحيح انه رحل.. لكن!! محله داخل اضلاعي
لو إن الغصن يتنكر..وينسى..طلعـة العنقـود=لو إن الورد يتحور ويصبح رمز مـن باعـي
وحتى الفجر لايبسم..ويصبح مطلعـه نمـرود=واشوف الكون متلفلف بحزنه والفرح لاعـي
انـا والله متغيـر ولـو كنتـي أمـل مفقـود=أعيش الوقت بالذكرى..تلف ذراعك ذراعـي
ياكم حبٍ بقى فتره ومات وصاحبـه موجـود=وكم عاشق..غدى مايت وحبـه دوم ينذاعـي
جسم عنتر..قضى..والقبر جاته ذاريات النـود=ولكنه بقى عايش..!! وذكـره للمـلأ شاعـي
وذا "وافي" عطى "شيمه" وعد مالحّقـه منقـود=على وضح النقا باقي عزيـزٍ لادعـا داعـي
وعد لاارثيك ياقلبي عدد بـرقٍ قفتـه رعـود=يلين الموت يلفيني ويُكسر مركـب شراعـي