البارحه ياروح روحي خنجر عتابـك حديـد=تومي بها واليا اسهبت بين الضلوع اركيتها
حُكم الغلا خلاك تطعني وانا اللـي مستفيـد=فديتك انت وكل طعنـه مـن يـدك فديتهـا
محبتك تجري بدمي من وريـد اليـا وريـد=بين الضلوع العوج بخشتهـا وقلبـي بيتهـا
لينت لك قلب(ن) لغيرك مـا يلينـه الحديـد=ولديت لك عين(ن) لغيرك مـا بعـد لديتهـا
وغنيت فيك النادرات الشاردات من القصيـد=اللي تثير الصمـت فـالجمهـور لاغنيتهـا
ونشرتها باشهـر مجلـه للقريـب وللبعيـد=على غلاف المختلف كلـن قـرا منشيتهـا
عقدن يليق بجيدك اللي فارقن عن كل جيـد=والشفه اللي هرجها معسول يخـرب بيتهـا
لاقلت اريد وقالت امر قلت مدري ويش اريد=قالت علامك قلـت انـا بغيتهـا واخطيتهـا
مره من المرات في ليـل ٍ نسانيسـه جليـد=هزتنـي الذكـرى وسرتنـي ونـا سريتهـا
مدري بطل مدري خبل مدري ذكي مدري بليد=مير المهم ان العنود اليـا دعتنيـي جيتهـا
وان شفتها عقب التعب والليل والبرد الشديد=واقـول ياليـت الليالـي كلـهـا ياليتـهـا
مرة شقاها للشقـي ولـذة سعدهـا للسعيـد=والذ منها الجمره اللي فـي يـدي ضميتهـا