الهيـــــــــــــلا *** منتدى قبيلة عتيبة

الهوازنيه للشاعر ثواب بن طنف الجعيد

سبحان محي الارض من بعد موتهـا

ولولا العنايه كان ماخضـر عودهـا

حنت عليهـا المرزمـات الغـوادي

يرجع بها المسني ليا اوحى رعودها

كن البرد حول الحصى حين ينتثـر

جوهر عذارى نثرت مـن عقودهـا

غدرانهـا سفـاح تزهـى رياضهـا

ريح العوالي في المحانـي تذودهـا

تغرد بها الاطيار مـن كـل ناحيـه

مـن الطـرب حدارهـا وسنودهـا

تلعب بها الاشواق حتـى تجاوبـت

واسترسلت مـن شوقهـا مجهودهـا

وجاوبتها بالصـوت مانـي بعاشـق

لكـن افكـار الضمايـر تعـودهـا

ان جيت ابا اقهرها تضايق بها الحشا

وان جيت اناحيهـا تزايـد ورودهـا

كنيتهـا فـي خاطـري واتعبتـنـي

ولاتختفـي دعـوى تبيـن شهودهـا

تسعى لنا الدنيـا وتطـوي عمارنـا

وبيـض الليالـي ماتعلـم بسودهـا

عزوم ٍليا قفت غـرورٍ ليـا اقبلـت

مكـارةٍ بـواقـةٍ فــي عهـودهـا

ان جيت احاربها واحـارب نعيمهـا

روحـي تباهـا والامانـي تقودهـا

وان قلت اجد السير اباهـا تعـذرت

وهي نومست ناسٍ هتيلـه زنودهـا

تنومس هتيـل حربتـه لابـن عمـه

دايـم مولمهـا وراكـز عمـودهـا

دايـم مولمهـا ويطعـن بهـا القفـا

والطيبـه مـن خلقتـه مـا يفودهـا

وعزي لقومٍ ينـزل البغـض بينهـم

بالتفرقه والبغض تشمـت حسودهـا

ومن عرض اقرابه لعوج الطلايـب

يذهـب معزتهـا ويكثـر زهودهـا

ويقطع هبيلٍ حكمتـه عنـد حرمتـه

يبدي لهـا سـده وتبـدي سدودهـا

على بسـاط البحـث بينـه وبينهـا

يبدع لهـا كلمـه وياخـذ ردودهـا

حتى ايش لو كانـت حياتـه طويلـه

عسى حفرته في سرع تطوى لحودها

وتـرى تفاصيـل الرياجيـل واجـد

يتعـب مغنيـن المثايـل عـدودهـا

عرفت لـي منهـا معانـي كثيـره

خابـر ثعالبهـا وخابـر فهـودهـا

تـرى الثعالـب مـا تغيـر عيالهـا

لو كـان تنقـش بالزمـرد جلودهـا

والحر الاشقر ما سكن فوق عرفجه

لو كـان مالـت بالثمـاري فنودهـا

ومن لاتنقـى فـي المناسـب تنـدم

وروح الفتى تزهيدهـا مـا يزودهـا

واناعتيبـي مـن سلالـة هــوازن

ربعي عوايدها الفخر مـن جدودهـا

ما نوشي الفتنه ولا نحـرث الـردى

ولا نهـاب اليـا تسامـت وقودهـا

ان ميـل الميـزان مـن قـوم يمنـا

صبرنا لها لوكـان كبـرت لهودهـا

وان ميل الميزان منـا علـى العـدا

نروي من السم السقطـري كبودهـا

رسمنا الثلاث البيض فـي الجاهليـه

واقرها الاسـلام واثبـت حدودهـا

من لاومن جاره فـلا هـو بمؤمـن

واهل الشرف للجار تبـذل جهودهـا

ومن لا اكرم اضيفان ما هو بمؤمـن

واهل الكرم جادت على قيس جودها

ومن لا يعـدي عـن خويـه بسيفـه

خساره على سبلاه تسكـن خدودهـا

ساهمت باابيات الشعر فـي محلهـا

مع جملة الشعار لا جـت وفودهـا

نفخـر باصالتنـا ويفخـر مليكـنـا

تحت راية التوحيد ثابـت وجودهـا

ملكنا امـام الشعـب قايـد جيوشـه

فيصل سعدها فـي ليالـي سعودهـا

واخوانه الاحرار نصره على العـدا

نمورٍ يقهر كـل طاغـي صمودهـا

والمملكة من غربهـا ليـن شرقهـا

ان حك حيـدٍ حيـد حنـا جنودهـا

اموالنـا وارواحنـا فــدوة لـهـا

نسخـى بهـا لسهالهـا واحيودهـا

ويحـرم عليهـا مـا تزيـن لغيرنـا

لو غطرفت بقعـا وساقـت قعودهـا

تمت وصلى الله على خيـرة المـلا

اللي هدى الكونيـن بامـر معبودهـا