يالله يالـلـي ماتـعـدد حسانـيـه=رحمتك يالمعبود جـزل الوهايـب
ياواحـدٍ كـلٍ يعـبـده ويرجـيـه=بفضلك تعدينـا عظيـم المصايـب
واللي بعدها البوك لاهنـت عطنيـه=واكتب بعد جـاء للقوافـي سبايـب
نويت اغني الشعر وارثـي مغنيـه=رفيق لوهو حدر عـوج النصايـب
عبدالمعين اعنيـه وارجـي لباريـه=يثبتـه قـدم الهـول والعجـايـب
شاعر عتيبه نسـج فكـره مسميـه=نظيف طـرق ولاسلـك للمعايـب
الشعر في موفـي حقوقـه نعزيـه=اللي نهج جزلـه شبـابٍ وشايـب
هذاك من خلد من الشعـر صافيـه=فوق الجموس ويوم وقت الركايـب
بالشعر عالـج كـل ماكـان يعنيـه=بالمنهج الواضـح بعيـد المعايـب
مبدع وفي حاضر زمانه وماضيـه=مواهـبـه ماتنـتـج ألا غـرايـب
كنـا نفـيـد ونستفـيـد بمعانـيـه=واليوم راس معلـم الشعـر غايـب
لاقيل بـن ثعلـي وهـذي قوافيـه=له خـط سيـرٍ مايشيبـه شوايـب
يازيـن لجـزال المعانـي تصديـه=ياخذ عذوبة وبـل غـر السحايـب
واليا نوى خصمه يضيـع هقاويـه=وعن عزوته ياقف بوجـه النوايـب
وشعر الوطن كسبه يجي من علاويه=والنصح عدابـه طـوال الرقايـب
وحنا نعزي أهل الأدب والأدب فيه=وأنهار شعـرٍ مالهـا عنـه نايـب
وقبيلـةٍ تفخـر بشعـره وطاريـه=حيثـه فقيـد بعيدهـم والقـرايـب
ونرجي الكريم بجنة الخلـد يؤويـه=مع من رحم من صالحين وحبايـب
وصلوا على المبعوث ماحل طاريه=وماهـل وبـل وماتهـب الهبايـب