قالت : احطب .. قلت : والغابـه متى كانت قريبـه=قالت : احطب .. قلت : وين الفأس لو حصّلت غابه
قالت : احطب .. قلت : يا قصر اليدين المستريبـه=قالت : احطب .. قلت : يا قل البصيره لإرتكابـه
قالت : البـرد إلتـوى فالضلع ترضى يلتـويبـه=قلت : لا .. قالت : وتتركني كـذا يـا للغـرابه
قلت: ملعـون الغبـاء وانتـي نجيبـه من نجيبـه=وألاّ انـا وقتـي إمبهـذلنـي وضيّعت النجابـه
لا تلـوميـن النبيـه ان حاصـره همّـه وغيبـه=ما تطـوفـه قبل لـكن طافتـه من حـرْ مابـه
والله انـي كنت قبل الشخص ينطـق لـي خطيبه=أتهجّـا فكـرته وأقـراه قبـل اسمـع خطـابـه
من عيـونـه كنت أميّـز مقصـده قبل يحكيبـه=وقبل تمـريـر السـؤال أمـرّر اطراف الاجابـه
كنت أفضفض للكئيـب ويمتلي بالضحك جيبـه=صـرت ما افضفض لعـُـمري وامتلا جيبي كآبـه
قالت : احطب قلت ويش احطب دخيل الله مصيبه=لا تزيـديـن الجـروح ولا تزيـديـن الرتابـه
قالت : الجرح يتمـادى عيب في حضـرة طبيبـه=قلت : ما باقي وريـد ودم من نـزف الاصـابـه
قالت : احطب من شعورك والقصيـد الحي جيبـه=ودي اسمـع صورتك واقراك صوت من الصبابـه
ديرها مغنـى وخـل الصمـت مخنـوق بنحيبـه=واعتبـر قلبي طبـل وألاّ اعتبـر سمعـي ربابـه
هـات شعـر وبلّل اللحظـه من البحر وغريبـه=لا تكـرر في عيـوني ملّـت العيـن التشـابـه
لا تسلـف حنجـرة غيرك وحنجـرتك رهيبـه=وانت شدْوك غير وارضك بكْر وافكارك سحابـه
واعتبـرني ملهمـه واحرث لي تـراب الخصيبـه=واروني من مـاك . مـاك ارواه لحظات انسكابـه
واقطع عروق الضما والجـدب واحساس الغليبـه=صـك بابه .. والعشم والفال تكفى فـك بابـه
وافتـح الشبـاك لأعشابك شبابيـكك عشيبـه=شوفها بعيـوني وهـذا الكلام احسب حسابـه
قلـت : يا طيبـة حنـان ويا حنـانٍ فيه طيبـه=يا مذابـه فالصفاء .. وألاّ الصفـاوه بك مذابـه
كـل مـا مريـت رجـم ادوّر الجـرّه لذيبـه=ما لمحـت آثـار واذنـي ما عـوت فيها الذيابه
وانتقـل للرجـم الآخـر والندم باسفل شعيبـه=ويتصاغرني وانا اكبـر من حصـاه ومن هضابـه
لا يعذربنـي وانـا ( مرزوق ) وجدودي عتيبـه=ننشـد التاريـخ مانجني سوا قدر و مهـابـه
مـا لبسنـا ثـوب عاريـه ولا جينـا بريبـه=وان تعرينـا بدون ثيـاب مـا فينـا عيـابـه
بس نستـر غيـرنا من طيبنـا ماهـي غصيبـه=لأجـل يستـر غيـرنا عيبـه وجسمه في ثيابـه
ولا يعذربنـي وانا المحّـار ف سـلالي حصيبـه=آتخيّـر فـي قماشـه وآتخيّـر فـي حصـابـه
والله انـي غيـص غبّـاتـه ولانـي فيه سيبـه=يزعـل الزعـلان والراضي على رأسي إعصابـه
ما كسبت السفن انـا للسفن شرواي الكسيبـه=من تواضـع قلتها ماهـو غـرور ولا دعـابـه
بس وين النـور واهل النـور والعقل الرحيبـه=ليـه تبقـى صامتـه والليـل ينهبهـا نهـابـه
والمثل ماهـو صحيـح ويا كبـر ظلمه وعيبـه=والقلم لولا الاصابـع ما ارتكب ذنب الكتابـه
من متى كان الحكي فضه ورخص وكان خيبـه=ومن متى كان الذهب صمت ووجل يا للخيابـه