مرثيه،،،،فالشيخ وصيل بن رجيان الزراقي...رحمه الله
 

هذه قصيده متواضعه مني وهي عباره عن رثاء في الشيخ وصيل بن رجيان الزراقي الذي وافته المنيه
مساء الثلاثاء 7/10/1429هـ

وفالحقيقه الشيخ وصيل رحمه الله لاتوفيه حروف اللغه العربيه من ألفها الى يائها
لانه بصريح العباره فقيدة القبيله بأكملها ولاكن هذه اجتهادات مني اتمنى ان تقبلوها كما هي ؟؟؟



ياهاجسي ماعاد فيها معاذير
........................ولاعاد فيها ياهجوسي طلايب

أما توردني على جمة البير
........................ولا بلاش من التعب والعقايب

خلاص مانقبل تهاون وتأخير
........................المسأله ماهي بضحك ودعايب

الموقف الغصاب مابه مواخير
.....................يبغى حرار(ن) ماتهاب الصعايب

وانته كفو ماحاصلن منك تقصير
......................واليا بدعت القاف ماهي غرايب

لكن دام الجو عجه ومعصير
......................اكرب حزامك لاتحوص وتهايب

وسوق القوافي سوق ذود(ن) مغاتير
..................واضهر حروف الي جروحه عطايب

اليوم حزني غير والعاطفه غير
........................وأنا من الاحزان ماني بطايب

وشلون اطيب وحالتي ماهي بخير
....................وراع الكرم عن جرهد البيد غايب

لا والله الا ياصدوف المقادير
...........................خلي جروك مانبيلك طبايب

مادام راح وصيل نسل المناعير
...........................لاخير فالدنيا وفوقه نصايب

وصيل راع الجود والجاه والخير
......................وراع الفعول الي من الله وهايب

روح وراحت فرحتي دون تبرير
.......................والحزن خيم في وجيه القرايب

احدن تلوفه ضيقته تالي عصير
......................وأحدن دموعه فوق خده صبايب

لكـــن مانملك بالاحزان تغيير
..........................كود الدعاء للي يسد النوايب

مرحوم ياشيخن تسوق التباشير
.......................ياالي فعولك مثل وبل السحايب

مرحوم يانسل الحرار المشاهير
......................ياالي على الجزله تحث الركايب

مرحوم ياالي لك معــزه وتقدير
......................ياأبن الشيوخ مطوعين الكتايب

منهو ولد غانم ومن سالم الزير
..........................انته مواقيفك حمت كل هايب

خلدت مجدن كنه طويق والنير
.......................مايخلفه صلف الهواء والهبايب

واشغلت فكرك يابعيد المشاوير
........................بالمرجله وانته مجرب وصايب

انت الفقيده بين كل الاساطير
.....................وموتك مصيبه من كبار المصايب

لكن شي(ن) صار لابده يصير
............................هذا قدر ربي وهذي سبايب

مكتوب موتك والليالي مقادير
.....................والموت مايرحم شباب(ن) وشايب


شعر،،، ابراهيم الزراقي

الله
الله الله






صح السااااااااانك

صح لسااااااااااانك والله يرحم اموات المسلمين
تقبل تحياتي

عبدالرحمن الهيلوم

الله يجزاك خير ويقبل منك ان شاء الله

وصح بدنك يالغالي والله لايهينك

ابراهيم الزراقي

صح الساااااااااااااااااااااااانك

والله يرحمه ويسكنه فسيح جناته


وعظم الله اجركم

صح بدنك ياخوي شامان الاسعدي والله لايهينك على المرور العطر

الله يجزاك الف خير يافواز وصح بدنك يابن العم ولاهنت على مرورك العطر

الشاعر الكبير والمتألق زبن القاضي

صح بدنك يابن العم

والله يقبل منك

ويجزاك خير

لك الود

الله يرحم الشيخ وصيل بن رجيان الروقي ويسكنه فسيح جناته
وصح لسانك يابراهيم على المرثيه الاكثر من رائعه وفعلاً ابدعت