ســـــلام للــعتبــان بـــرقا مـــع روق = مــن شــــاعرن يــــــلعب على كل طاروق
انــتم هـــــــل الــميقاف مــن عــهد فــاروق =والله يـبـيـض وجــه زايــد جــمـعـنا
مبروك يا سعدون حماد مبروك =ما خابو العتبان من يوم سموك
بالحوت لنك تشبه الحوت يا خوك =والله يبيض وجه زايد جمعنا
عزالله إنك ترفع الرأس يا حوت=واللي مثل شرواك نرخص له الموت
ماهو خساره فيك عزالله الصوت=والله يبيض وجه زايد جمعنا
من دون قاصر في رجال القبيله =بيرق عتيبه انت كفوه وشيله
شيله يابوحماد بهون وسيله =والله يبيض وجه زايد جمعنا
ياالله انا طالبك يا خالق الكون =تجعل عتيبه كلها بصف سعدون
يستاهل الوقفه ويستاهل العون =والله يبيض وجه زايد جمعنا
سعدون ابن حماد عز لعتيبه=ما خاب ظن اللي يبا يعتزيبه
مواقف الرجال تشهد بطيبه=والله يبيض وجه زايد جمعنا
لاجيت ابوحماد والصدر ضايق =عزالله انه ينجلي في دقايق
شوفه يخلي ضايق الصدر رايق=والله يبيض وجه زايد جمعنا
في مجلسه موجود في كل ساعة =واليا نخيته قال سمعن وطاعة
ياحي رجالن يعز الجماعه =والله يبيض وجه زايد جمعنا
ماهو سوات اللي ليا حقق الفوز =يقفل الجوال وهالشي ما يجوز
ما تاجده موجود في ساعة العوز =والله يبيض وجه زايد جمعنا
اشر خلق الله رجلن بوجهين =يضحك معاك اليوم وينساك بعدين
ما يعرف المعروف ولا يوفي الدين =والله يبيض وجه زايد جمعنا
سعدون طيب ما يخلي ربوعه =ولو إيتعلا ما يغير طبوعه
والنفس يعسفها وتصبح قنوعه =والله يبيض وجه زايد جمعنا
لوكان بأمريكا وضده اوباما =يجيب للعتبان عرش الزعاما
هذي مواقيفه وياما وياما =والله يبيض وجه زايد جمعنا
بهديك يا سعدون بعض النصايح =ما دام ريح المسك والعود فايح
الكل من هالارض ميت ورايح =والله يبيض وجه زايد جمعنا
ما دام صرت اليوم في مجلس امة = الكل ياتيلك ويشيك همه
احرص على اللي دمكم مثل دمه =والله يبيض وجه زايد جمعنا
المال فتنه وحذر المال يغويك =كم واحدن يضعف ليا وقع الشيك
اليا رخصت النفس ضاعت مباديك = والله يبيض وجه زايد جمعنا
خل الشريعه قدم عينك على طول =مال الربا لو زاد له يوم ويزول
افهم وما كل زول بيعوض عن زول =والله يبيض وجه زايد جمعنا
المركزي يصدر قرارات فوضه=صار الكويتي يشتكي من قروضه
لا تتركه وتقول ربي يعوضه =والله يبيض وجخ زايد جمعنا
ترا البلد محكوم في حكم تجار = واكبر دليل السوق طايح ومنهار
حسبي على اللي فالخفى ولع النار =والله يبيض وجه زايد جمعنا
الكل من هالسوق ضايق وثاير =واسعار الاسهم مثل سعر الفطاير
ابيك تفزع لا تزيد الخساير =والله يبيض وجه زايد جمعنا
استجوب الجاني ولو كان من كان=وعلى المنصه اسحب افلان وفلان
لا تقول هذا سوق رابح وخسران =والله يبيض وجه زايد جمعنا
ترا خراب الدار لا جات الاحزاب =البعض ياخذ من تعاليم الاجناب
اقبل نصايح قالها صالح عقاب =والله يبيض وجه زايد جمعنا
وختامها صلو على ناشر الدين = اللي ظهر فالكون في يوم الاثنين
محمد المختار سيد المصلين= والله يبيض وجه زايد جمعنا