مـاطاعني وقتي لاكن والله مـــاطيع = والله ماطيعه وهاذي طبيـــــعه
رجـال طـاعو بس سارو جــــــــرابيع = ماني بطايع له وجايع وجيــعه
وانا خــــوي الــذيب راع المــشاريع = ولا الردي واقد بكبدي وليـــعه
مع النشـاما اشري الطيب وابيـــــع = ومن باعنى باطيب ياسهل بيعـه
شـاعر وماهر رافع النفس ترفـــيع = واسبح مع الشعار سبحه سريعه
واطرب بفعلي لابـسات الدراريـــع = واقهرك يالي لك علومً وظيــعه
وذكري مع الي ينطحون المفـاجيع = واكرم عن الي كل شيً يريـعه
وبارواحــنا دون القـرابه مـــــوانيع = وبفـعالنـا حنا رجالً مـــــنيعه
والجار لـــــه حقه وحنا له نــــشيع = يبـشر بـعزه كلنــا له دفيـــعه
والضيف له واجب وحنا مــــطاويع = ولكل ضـيفً لــه كرامه رفــيعه
والي يعـادينا يشــوف المــشانيع = نلعن شياطينـه ونلعن صنيـــعه
واستغفرك يارب من كل ماشيـــع = يالله عـسانا لك رجالً مطــــيعه
يارب وقتي يوم شرب القـراطيع = شرب الدماء شرب المياه السنيعه
ابكيك ياوقتً غـدى بك تنــــاويع = سـارت علومك لنشاما فـــجيعه
الوقت هاذا وقـت حمود و ظفيع = وقت الهبا وقت الخبا لي فضيـعه
لكن على الي له هبوب الذعاذيع = اني على طبعي وهاذي طبيـعه
على طبوع الي ( تمالو مع الريع) = يوم الحرايب والوقـايد وليــــــعه (1)