هلا يا مرحبا ترحيبة الشاعر بشهر العيد = اقوله دوم والاعياد مبروكة لياليها
الا ليت الزمن يرجع ورا حولن ياليت تعيد = على ذكرى نفود السر مرها وحاليها

يدوم الك البقا ياشاعرٍ ما تقبل التحديد=يجيك اقرب بني عمّك وياخذها ويعطيها
الا ياليت هاك العام يانسل القروم ايعيد=نشوف اشيوخنا بالعزّ زاهيةّ كراسيها

ابهرج مع ولد عمي عسى الاموال بنّا تزيد = وابعطيه العلوم اللي على راسي مراسيها
يطيب الملتقى يوم الجمع من دانيٍ وبعيد = وكلن قام يذكر طيبها هيلا عزاويها

تهرّج والعذر لن كان جاك اللعب بالتقصيد=ترا وقت الملاعب ياصحيبي ما نساويها
هذاك الملتقى الأصلي مهوب الملتقى التقليد=تبى تفنى قبايل نجد ما وصلت حراويها

تقصدها واظنك عايشٍ عمرك على التسديد = ولن جتك العلوم القادمة حاذر خفاويها
تجمع قادة عتيبه من الثبتان وابن حميد = الا ياقصر مدتها وياعظمة مبانيها

انا سدّاد دين ولا عليّه من قليل الفيد=لكنّ انته طلعت اليوم حاميها حراميها
الا ياسعد عيني يوم غطّوا بالبيوت البيد=ومدّات الشيوخ اطوال ما تقصر يمانيها