الله من قلبٍ ليا جيت اداريه=القاه من بين الضماير يزوعي
زوعت خفيف الريش من كف راعيه=ليا شاف له صيدٍ مقافٍ رتوعي
على عشيرٍ كل ما حل طاريه=افز له و اجلس على راس كوعي
أفز فزت غافلٍ جاه غاليه=يفز له لو الخلايق هجوعي
وا صاحبي ماله حليٍ يحاليه=ألا سهيل ليا شمخ بالطلوعي
ليا مشى كن الحمامه تخطيه=ضامر حشا ملهوف من غير جوعي
العين عين اللي على كف داعيه=عين اشقرٍ منه الحباري خشوعي
ليا التوى بالجول حل القضا فيه=قدمه هباش الصيد مثل الرثوعي
و الله لو هو من ورى مصر لأرجيه=رجوى الديار المسنيه للرجوعي
وا صاحبي ليته قريبٍ و اناديه=اظن قلبي يمّهم ما يتوعي
قلبي كما غربٍ تجزّل عراويه=على ثلاثٍ يضربن الرجوعي
إن صدرن به و انكفى كل مافيه=من تلّهن للغرب غادٍ مزوعي
سوّاقهن في تالي الليل يسريه=و في ما تقافن نوّهن بالرجوعي
ما تسمع ألا يوم لجّت غناويه=الليل ظلما و الغلام مخفوعي