يالله يارب الخلايق يامعين الصابرين = ياواحدٍ مدات جودك وافيٍ مكيالها
تجعل لنا هيبه وقيمه مع هل العلم الثمين = ليا دعا الماقف ونادوا للزوم رجالها
من بعدها سلام تسليمت وفاء للحاضرين = تنساق مثل الدله اللي دارجٍ فنجالها
تنصا هل الردات والميقاف من ماض السنين = اللابه اللي تنعرف بين العرب بفعالها
قومٍ ليا نادا المنادي فاللوازم حاضرين = شيالة حمول الزمان خفافها وثقالها
يوم الملاقا يدحمون القوم بالجنب المتين = مركاضهم تشبع به سباع الخلاء وعيالها
دقلاتهم تعجب وتغضب لامشوا متحيزمين = لنحوا كما سيلٍ تحدر من علوا جبالها
دون العشاير ياقفون ويرخصون الأحمرين = حامينها يوم السنين اللي تهيل اهوالها
كم فارسٍ من دونها عود وهو خال اليدين = وكم مهرةٍ راحت قلاعه وجعفوا خيالها
برقاء وروق من السنين الماضيه متكاتفين = هيلآ على العليا تعلت والسفاير فالها
يشهد لهم نجد المسمى والقبايل شاهدين = قبيلةٍ بالعز تمشي والسعد يبرالها
واليوم في ضل السعود معززين مكرمين = الشجره اللي ضافيٍ فوق البلاد ضلالها
لعل محفلنا وجمعانا على تقوى ودين = ولعل ساعات الفرح دايم تعود ليا لها
حضرت اشارك مع بني عمي على سمن وسمين = وشوش وفخر يوم امجد لابتي وعنالها
وان كان به تقصير نرج المعذره يالسامعين = ماكل قايل كلمته ترض العرب لاقالها
وختامها صلوا على المبعوث خير المرسلين = عداد ماتنش المزون وينهمل همالها
وعداد ماحجوا ومالبوا جموع المسلمين = في ساعة كل العباد المؤمنه تسعا لها