الهيـــــــــــــلا *** منتدى قبيلة عتيبة

ياللأسف ماعـاد فيه رجاجيـل
من موضه لموضه نـدق التحايـا
طاحو شباب اليوم في ذا البناطيـل
واجسادهم صارت للأعمى عرايـا
مـرات طيحنـي وورينـي الويـل
واذا بغيت تشـوف طالـع ورايـا
ومرات سامحني يابابا على الذيـل
بلبس مثل مايلبـس اللـي معايـا
احد(ن) يخافك لو تهـزه بمنديـل
ومسوي انه صاحب اكبـر قضايـا
واحد(ن) يخاف انك تذكره بالليـل
كنك تسولف له بطـاري المنايـا
من جيـل لاجيـل لاجيـل لاجيـل
الين صرنا فـي زمـان الصبايـا
لاواحسافه راحوا اللـي مصاقيـل
اللي لهم فـي كـل وقفـه مزايـا
كلامهـم كلـه مراحـب وتهليـل
وأوقاتهم ذكر وحـروب وسرايـا
ماهزهم فقر(ن) ولاهدهـم حيـل
وان ضاقت العيشه سعوا في البرايا
والا شباب الوقـت هـذا مهابيـل
يفكـر الموضـه تشـد الـولايـا
يقلد الموضه وجسمه تقـل فيـل
مايـدري انـه تشتكيـه المرايـا
ان قاله الله تبتقولـون قـد قيـل
انه يجي يوم(ن) وتلبـس عبايـا
لكني استثنـي فحـول ورجاجيـل
الله عطاهم مـن كريـم العطايـا
فينا شباب(ن) للرجولـه مشاكيـل
وفينا نفوس (ن) ماتحب الخطايـا