الهيـــــــــــــلا *** منتدى قبيلة عتيبة

السلام عليكم .............
اقدم لكم مشاركة من مشاركاتي البسيطه, وارجوا أن تحوز على رضاكم , والقصد من هذه المشاركات أن يكون منتدانا العظيم بأحسن صوره
وأكثر فاعليه , وهذا واجب على كل من يحمل في بطاقته المدنيه لقب ( العتيبي) ,,,,, ولكم المشاركه
يقول الشاعر عبدالرحمن الراضي في غلاء المهور وعوائد العروس في وسط نجد.....

صحيح انا كبرت والعرس ملزوم ** ويغز قلبي لاحكى واحد(ن) فيه
لاشك دون العرس عادات وسلوم ** ومن يسمعه ماعاد نفسه تهوف به
الياطلبت البنت قالو بها السوم ** حق الابو سبعة الاف بتعطيه
وثلاثة للام تدفع هاك اليوم ** ياللي تجيهم ناوي العرس باغيه
واخوانها وعماتها وباقي القوم ** كل(ن) يبي حقه ومجبور ترضيه
وطوايق وبشوت واطياب وهدوم ** اللي حضر والغايب الكل تكسيه
وخطيبتك شييه على جنب مفهوم ** اربع الاف للذهب شرط تشريه
اضـافـة هذا الى غرفـة الـنوم ** ودولابها من كل خرقه تمليه
وحق العشاء خمسة الاف ملزوم ** تدفع تكاليفه ولو ماانت باغيه
وزيارة الحريم يوم(ن) ورى يوم ** والبيت واثاثه ترى حكيهن فيه
حب الشرافه طبعهن دايم الدوم ** وياويل مطلوب(ن) لهن تعترض فيه
يمضي شهر ماذقت راحة ولانوم ** هذا يجي وذاك تبتلش توديه
سعادتك صارت غرابيل وهموم ** الدين الحقك وانت من وين توفيه
خلاص ابي انهي باقي العمر بالصوم ** مانيب قادر(ن) له ولانيب قاويه
كم واحد(ن) مثلي مع الناس محروم ** ودك تشوفه كيف ليل(ن) يمضيه
وكم بنت(ن) وسط الدار والباب مردوم ** الظاهر ان اللى أعاني تعانيه
رسولنا زوج بأيات وختوم ** سن الزواج وين من يقتدي فيه
عادات شيلوها ترى مالها لزوم ** لوسيلة العادات كل(ن) شرع فيه

وسلامتكم ........
منقول من كتاب ( المجموعة البهية للاشعار النبطيه) جمع وترتيب عبدالمحسن أبابطين