شعتني علوم الصيف وارقلت للمسناد=ولا عاد يعذل واحد طافح شبله
آبي عبلة ضافي عليها كما السجاد=ديار يرود عدودها من يحب ابله
ولا عاد لي من يوم سال الشفا مقعاد=عتيبي وداري فوق ونحيتي قبله
ما دامه وكد لي سيل وادي قليب عناد=انا ويش يحرمني شفا نجد والعبله
ابتبع هوى وضحا تحط البيد سناد=لها غير زين طبوعها خدة قبله
ليا سمعت الحادي نده ندهة الميراد=تقود اول الزعجول لول وتقرب له
ابيها ترفع فوق عن ساخن الانفاد=وتجي في فياح كل مصلاح يطرب له
انا في الديار الطامنه في تعب وجهاد=على كثر مرعاها مداخيلها خبله
عساها يساقيها المطر ديرة الاجواد=ولابيها لون ثمامها ينقلب ربله

شعتني قصيدة شاعر عذب القصاد=ما حد يستلذ السالفة لين تنسب له
علومك يا بو نايف قراحٍ على الأكباد=لكن تجرح قلوبٍ مع الوضح منهبله
مواليف وضحٍ كنها وضحى بن عبّاد=لا شافها راعي الدبش طيرت شبله
تواغض مع الريضان كنها خيام أسياد=لونها بعيدٍ بادي الرجم تقرب له
أو حمّى مغاتيرٍ مقاديمها شراد=هريب السحاب اللي تواليه منسبله
قبلها ليا من المناره سناها زاد=قبل الاشهب المرشوش لا فضوا اصطبله
عنقا مارقٍ نسنوسها سدوها منقاد=مع طول خدتها خراطيمها سبله
شناحٍ طفوح شبلها دايمٍ خداد=لونها مع ذود ابن عمي خذيت ابله
لاضاقت براعيها الوسيعة بكل بلاد=يحوم وكبده من هل المدن مندبله
لا منه نطحها عصر ولا هجد مهجاد=ليا شافته قامت ترازم ترحب له
هذي تنطحه تبغى تقبله جد عماد=وهذي تنهب شماغه وهذيك تلعب له

عبدالله الجذع