حبيبي هاك قلبي .. وأبحث اللي مشغل ٍ بالـك=تصفّح سيرته .. وأكشف خفايـاه وتفاصيلـه
من الأرشيف شوف اللي ما شيف وحطّ معدالك=ولا تحكم علـى دمّـه قبـل تقـرا تحاليلـه
تنقّل بين صفحاته مـدام البحـث يحـلا لـك=وتابع قصّته مع كل عاشق قـام يومـي لـه
صحيح أنّه كبير وكـلّ درب ٍ يآصلـه سالـك=لكنّه دون بابه حـطّ لـه .. لفّـه وتحويلـه
علاقاته كثيره مير مـا جاتـه مـن أمثالـك=تجيه من الوهم وأطول علاقه عمرها ليلـه !
دخلها من طرف واحد وصار الوصل متهالـك=وطلع منها قبل تفشي دموعـه سـرّ منديلـه
وبعد شمسك بدت تكبر عليه ويكبـر ظلالـك=تعدّل حال طقسه من غرامك وأعتـدل ميلـه
بدت تلعب هبوبك وألتـوا عقـدك بسلسالـك=وصار اللي ما بين العقد والسلسال يا ويلـه !
دفع دقّات نبضه كلها وأمسـت علـى جالـك=وجلس مع عزف دقاته يغنـي لـك مواويلـه
رضخ لك لين صرت اللي تجوّل فيـه بلحالـك=لو أنّه من قديم الوقت مـا تشـرب فناجيلـه
ترفّق بـه ولا ترمـي عليـه اللـي يورّالـك=بعيد الشك عن بذرة غـلاه وعـن محاصيلـه
تحكّم به على كيفك بعـد مـا طـاب منزالـك=على عرشه ولا ترضى على الحاكـم بتبديلـه
يحبّك والشعور الحيّ .. يحيى له ويحيى لـك=يعيش الحبّ لو شان الزمـان وقلّـت الحيلـه
كذا والبحث جاري وأنت في حلّـك وترحالـك=تجرّه مع دروبك ليـن ترجـع فـي مداهيلـه
يقولون العرب .. يا حبّ فـال الله ولا فالـك=وأنا أقول الجفا بلوى .. ويا فرقا من أنتي له !

المشاركة الأصلية كتبت بواسطة محمد العتيبي (المشاركة 714715) احدى قصائد سداح الشامخه .. عبدالعزيز الجذع اهنئك على الذائقه الرائعه لاتحرمنا قصائد المبدع سداح .. ولك خالص الشكر تحيتي ...

المشاركة الأصلية كتبت بواسطة السبيــــعي (المشاركة 716062) يقولون العرب .. يا حبّ فال الله ولا فالك وأنا أقول الجفا بلوى .. ويا فرقا من أنتي له ! الله رااائعه ياعبدالعزيز صح لسان سداح وقلبه وسلمت عالنقل بيض الله وجهكـ يالغالي

المشاركة الأصلية كتبت بواسطة وافي الخماش (المشاركة 717524) سداح شاعر رائع اتمنى ان يعطى الفرصة ويظهر اعلامياً ..