ياسامعن قولي عباره عباره=قول(ن) منزه مايجي فيه تزوير
قول(ن) يبا يجلا الظلام بأناره=في وقتنا اللي كل الأوصاف به غير
وقت(ن) به العربان مثل العماره=اللي تبا مع طايل الوقت تغيير
لاطال عمر البيت يتعب جداره=خص(ن) إليا كثرت عليه الأعاصير
ياشين طبع الخلق عقب التجاره=فقرانهم يذوق عسر وتعازير
ماعاد تلقى فالخلايق نعاره=كلن بحاله في جميع التعابير
أنا درست أطباعهم بالشطاره=ثم اختبرت أحوالهم بالمعايير
تسعين بالميه نتاج اختباره=لقيتهم ماينكرون المناكير
ورفيقهم لو عز ربعه وجاره=تجيه هجمات اللغاوي مغاوير
تشوفهم بالحكي نمر النماره=وإن جا زمان الفعل راحوا شعاثير
يستقبلون الهرج مثل البشاره=إن كان به هزب ومسبه وتشهير
ويفسرونه بالهوى والقذاره=ويرحلونه يم راع الثراثير
ثم سجلوه بذاكرتهم عياره=مافيه للمشتوم دمح ومعاذير
منهم ترى بالقلب غبن وحراره=حكي القفا جاله مع الوقت تأثير
والطيب اللي ودنا جنب داره=ماله حقوق عند ربع الدنانير
ولو ضرب يمناه بعدوه دماره=ماشاف في هالوقت سمعه وتقدير
ومادام طير البوم كبروا صغاره=تبا تشوف بقادم الوقت تقصير
ومادامت البغضاء بقت فالصداره=ودنيا العنا تمشي على دهنة السير
ومادام قل الدين جاله أشاره=والعاقله فالقوم واهي تدابير
عز الخفوق اللي يشيل الغياره=وقله ترى هالوقت ماعاد به خير

ومادام قل الديـن جالـه أشـاره والعاقله فالقـوم واهـي تدابيـر عز الخفوق اللي يشيـل الغيـاره وقله ترى هالوقت ماعاد به خيـر