يامـن لقلـبٍ كـل ماالتـمّ الاشفـاق=من عام الاول به دواكيـك وخفـوق
يجاهد جنودٍ في سواهيـج الاطـراق=و يكشف له أسرارٍ كتمها بصنـدوق
إلى عنّ له تذكار الأحبـاب واشتـاق=باله وطف بخاطـره طـاري الشـوق
قربت له مـن غايـة البـن مـالاق=بالكف ناقيها عـن العـذف منسـوق
إحمس ثلاث ٍ يانديمـي علـى سـاق=ريحه على جمر الغضا يفضح السوق
حذراك و النيـة وبالـك والإحـراق=واصحى تصير بحمسة البن مطفـوق
الى اصفرّ لونه ثم بشّـت بالاعـراق=وصارت كما الياقوت يطرب له الموق
وعطّت بريـح ٍفاضـح ٍفاخـر ٍفـاق=لا عنبر ٍ ريحـه بالانفـاس منشـوق
دقـه بنجـر ٍ يسمعـه كـل مشتـاق=راع الهوى يطـرب ليـادق بخفـوق
واحشه بدلـة مولـع ٍ كنهـا سـاق=بلـورة ٍ منصوبـة ٍ تقـل غرنـوق
خلّه تفوح وراعـي الكيـف يشتـاق=الى طفح له جوهرٍِ صـح لـه لـوق
أصغراقمـوره كالزمـرد بالأشـعـاق=وكبارها الطافح كمـا صافـي المـوق
زلّه على وضحا بها خمسـة ارنـاق=هيل ٍ و مسمار ٍ بالأسبـاب مسحـوق
مع زعفرانٍ والشمطري الى انسـاق=ريحه مع العنبرعلى الطـاق مطبـوق
إلـى اجتمـع هـذا وهـذا بتيفـاق=فصبه كفيت العوق عن كـل مخلـوق
بفنجال صين ٍ صافي عنـه الارمـاق=تغضي وكرسيـه غـدان ٍ لمعشـوق
الى صب فابصر جوهره تقل شبـراق=رنق ٍ تصور بالحمامة علـى الطـوق
شكل غَرَا الفنجال صبغـه كمـا راق=دمّ الغزال الى امّـزع منـه معلـوق
خمر ٍ الـى منـه تساقـى بالاريـاق=وعليه من ماء صافي الورد مذلـوق
راعيه كنـه شـارب ٍ ريـق تريـاق=كاس الطرب واسرور من ذاق له ذوق
يحتاج من خمرالسكـارى الـى فـاق=طفل ٍ يشف شفاه والعنـق مفهـوق
عبث ٍ يعيل ابحُبـة ٍ منـه مـا مـاق=وهو يباهـي باهـي البـدر بشعـوق
في وجنتيه الى غنـج بـارق ٍ حـاق=عجل ٍ رفيفه بالطها الغـرق بطبـوق
سحر ٍكتب مـن حبرعينيـه بـاوراق=خديه صادين ٍ و نونيـن مـن فـوق
كن العرق بخدودهـا حـصّ ارنـاق=نثر على صفحـات بلـورة الشـوق
إلى تبسـم شـع و أشـرق بالآفـاق=نور ٍ يفوق البـدر سحـار منطـوق
والعنق كن المسك والـورس بـراق=ما مشخص ٍ في صدره الشاخ مدفوق
يمشي برفق ٍ خايف ٍ مدمـج السـاق=يفصم حجول ٍ هزه الثقل مـن فـوق
الى صفت لك ساعة ٍ و أنت مشتـاق=فاقطف زهر مالاق و العمـر ملحـوق
فالى حضر ماقلت عنـدي فـالارزاق=بيـدي كريـم ٍ كافـل كـل مخلـوق
والله لو يمشـي شقـاق ٍ بالأسـواق=من الملاء مايمسط الخمـس مخلـوق
هذا و صلوا عـد مـا نـاض بـراق=أو ماشكى الفر قا شفيـق ٍ لمشفـوق
على النبي مـا زج زاج ٍ بـا لأوراق=و آله و صحبه عد ماسيق مسيـوق

ياريـف قلبـي للمساييـر قـم شـب=وحط المناره فـي طويـل الضلالـي
عقب تشق لها لجزل الحطـب جـب=وهات النجر وأحضر جـداد الدلالـي
ثلاثن الهـن راعـي الكيـف يطـرب=وسوطهـن ضمـر والآخـر جلالـي
وبطونهن ماخذن اسبوعن عن الـرب=وجنوبهـن صفـرً تــلالا تـلالـي
والرابعـه ملقامـةٍ لونهـا أصـهـب=حيـث إنهـا للنـار دايـم تصـالـي
ولاجبت كل شروطهـا اللـي تطلـب=إجلـس عليهـن يازعيـم العيـالـي
وإحمـس لنـا بريـة ٍحبهـا أشهـب=وبهارهـا هنـدي ومـاهـا زلالــي
وإعـرف تـرى قانونهـا مايخـرب=وندارهـا ينقـى ومـاهـا يكـالـي
تـراه مايصلـح لهـا كـل مـذهـب=ولاتقبـل الراضـه ولا الاعتجـالـي
وليا حمست إحرص على حمسة الحب=واعرف ترى الحمسه تبي وسع بالـي
تاخذ على ادنى الجمـر فتـره تقلـب=لين العـرق يطلـع سـوات اللوالـي
ومن يوم يطلـع فالمبـرد لهـا كـب=ليـن النـدار ان كـان فيهـا يشالـي
وليـا خـذت مقـدار للنجـر قـرب=ودنه بصـوتٍ يسمعـه كـل غالـي
دنـه وخـلـه للمسايـيـر يـجـذب=لاقـام صوتـه للنشـامـى يـلالـي
يوحونـه الجيـران لاقــم يقـنـب=ويجيك الاقصى والقصيـر الموالـي
وعقـب تـدق البـن لقـم وركــب=ليـن انهـا تسمـح مـن الاجتوالـي
وقبـل تبهرهـا عـن النـار تجـذب=وتركد شويه ليـن يصفـى الحثالـي
وبرويد في أحـدى المباهيـر تسكـب=من عقب غـال الهيـل فيهـا يهالـي
واعـرف ليـا بهرتـهـا يالمشـبـب=تـراه يكفيهـا مـن النـار صـالـي
ثم اجذهـا مـن يـوم بالهيـل تقلـب=ومن يـوم تركـد صبهـا للرجالـي
حتى يجـي الفنجـال منهـا لياصـب=بيـن الشقـار وبيـن لـون الشعالـي
يطرب لها من كـان للكيـف يشـرب=كيف النشامى اللي من العيـب خالـي
واعـرف تراهـا عـادةٍ ماتسـيـب=ولاينتقدهـا إلا قصـيـر الحبـالـي
احرص تخلـي عـادة الجـد والاب=ما هم عليـه اول عليـه انـت تالـي
تـراك مـن كـل المناسـب معـرب=مابيـن جـدان وعـمـام وخـوالـي
وابيـك عـن منهاجهـم مـا تجنـب=ان كـان فكـنـك بـنـات الليـالـي

ماني بهلبـاجٍ علـى النـوم نعّـاس=همـه طعامـه ليـن كرشـه ملاهـا
أدرّج الدنيـا بالأفـعـال وقـيـاس=نسعد عيون وعيـن نسحـن دواهـا
لي ضاق صدري جبت نجرٍ ومحماس=ودلال بيـضٍ غـالـيٍ مشتـراهـا
قم سو فنجالٍ على خمسـة أجنـاس=إحذر تجـي حرقـة وبالـك نياهـا
خلك لها من كل عـذروب حسـاس=قيّس لها الطبخـة علـى قـد ماهـا
حتى يجي فنجالها يجـل الاعمـاس=عقب الصلف والسهر مكبـر غلاهـا
خصص مشاكيلٍ على النار جـلاس=حبوس الرجال اللـي بعيـد مداهـا
بـدّوا بـه اللـي للمعاديـن نطّـاس=مودع سمـان الهجـن يثلـع حفاهـا
والثاني اللي يثني العصـب بالـراس=في ربعةٍ يشبـع بهـا مـن نصاهـا
والثالث اللي يحتمـي دن الأفـراس=لي روحـت خيـلٍ بخيـلٍ حماهـا
وباقي الملا لـو ماتقهويـه لابـاس=هـذارة المجلـس قلـيـلٍ حـلاهـا
لانافـعٍ ربعـة ولا حـاش نومـاس=ضبّـاط مـال، ولايـذري ذراهــا

البن كيفه عنـد مـن يشترونـه=الطيب اللي جابها مـن بلدهـا
يا حامسين البـن لا تحرقونـه=داروا على الحمسه يعدي صمدها
حتى يجيك محمـر تقـل لونـه=بزة جرادة طالعة مـن جسدهـا
عده على اللي لابتـه يدهلونـه=له ربعة من قام منهـا حمدهـا
وأثنه على اللي بينات أطعونـه=الخيل يركبها الوعر مع سندهـا
وصبه على اللي لابته يتبعونـه=مع دربه الخلفاء تضيـع ولدهـا
وعده عن اللي واقف وسط شونه=ليا باع شاته حافظلـك عددهـا
وسط الجماعة طايرات عيونـه=في كل يومن يحتسب في وعدها

يا بجاد شب النار وادن الدلالـي=وأحمس لنا يا بجاد ما يقعد الراس
ودقه بنجر يـا ظريـف العيالـي=يجذب لنا ربع على اكوار جـلاس
وزله الى منه رقـد كـل سالـي=وخله يفوح وقنن الهيـل بقيـاس
وصبه ومده يـا كريـم السبالـي=يبعد همومي يوم اشمه بالانفـاس
فنجال يغدي مـا تصـور ببالـي=روابع تضرب به أخماس وأسداس

يا كليب شب النار يا كليب شبة =عليك شبة والحطب لك يجابي
وعلي انا يا كليب هيلة وحبة =وعليك تقليط الدلال العذابي
وادغث لها يا كليب من جزل حبة =وشبة ليامن غفى كل هابي
باغ ليا شبيتها ثم قبة =تجذب لنا ربع سرات غيابي
بنسرية يا كليب صلف مهبة = لانسنست لياكن به سم دابي
سراة بليل وناطحين مهبة =متنكفين وسوقهم بالعقابي
خطو الولد لوله زبون وجبة = ياتي عليهم من حساب الزهابي
لاباطن الهلباج خطو الجلبة =يا حلو خبط عصيهم بالركابي
اطمر لهم وابدي سلام ومحبة =لاجو على هجن يديهن خرابي
بسلام احلى من شخاليل جبة =واحلى من السمن الجديد العرابي
مع كبش مصلاح لك الله نجبة = لا دبر الهين كبير العلابي
الوالمة يا كليب عجل بصبة = والرزق عند اللي ينشي السحابي