يا اهل النياق اللي عليهن تصكون =من فضلكم لا تسجنـون البهايـم
مافيه داعـي للبهايـم تحبسـون =خلو عطايـا الله تـذب الخرايـم
ياليتكم عن مشتراهـا تجـوزون =ولا تبعد عن صطـول القمايـم
اما عطوهـا حقهـا لا تشحـون =ولا اتركوهـا مالكـم بالظلايـم
بحقوقها اللي وافيـه لا تعيـون =الله عطاهـا للصحـاري قوايـم
والبل بها شجعان نجد يتعـزوون =اللي وراهـا يجدعـون العمايـم
مقدارها عند المناعير مضمـون =يومنهـا بيـن القبايـل غنايـم
ليت الذي تحت المقابر يشوفـون =اللي عن البل جاهـدوا بالعزايـم
اللي بميدان المعـارك يهوشـون =يوم الرمك تعطي هجوم وهزايـم
هذا وانا مالي على الناس قانـون =وجهة نظر ما افرض عليهم لزايم
واللي عطوها حقهـا مايلامـون =بعنايـة البـل مالحقهـم لوايـم