سلام الله سلامن فيه ريح بن وريح هيل=يعم اللي حضر بالمنتدى ويعم غايبها
الا ياهيه وين اللي يجمل وقفته تجميل=يقوم ويرتكي ماحسب حساب لعواقبها

هلا يا مرحبا ترحيبة تبدي سواة سهيل=تراحيب الرجال اللي تكمل في مواجبها
تهرج يا طويل العمر والمعنى سواة الخيل=وطيب الخيل لو تدري ..ترى من طيب راكبها..!!

تولم ثم تحزم يالسنافي والمسرى طويل=ترى كم واحدن هون عقب ما احفى ركايبها
ليا شفت البروق اللي تكاشف احذر من السيل=ترى ما ينومن سيله ليا سالت شعايبها

عوافي ياوسيع المعرفه لو تكثر التطبيل=نعرف أهل المناصب ما جهلنا في مناصبها..ّّ!!
بروق الصيف ما تمطر ولا ظني تزيد الكيل=تمر الدار وعيون الخلايق ما تراقبها

ترى ماينقل الحمل الثقيل الا جملها شعيل=يبرك لها يومن غيره يزري مايقومبها
انا وياك والميدان عانه ياقوي الحيل=وعقَب شارب ينكف سهامه ما يخضبها