يا خليفة مطلق ان ما كان ودك بالصراحة =انت فعلاً في محل الراحل اللي ذاع صيته
وان بغيت الحق ما غطيت لو ربع المساحة=منهجك ماهوب منهاجه وبيتك غير بيته

وانت لو تبغى الصراحه طير لو يرفع جناحه=مايطير وفوق راس العود ماواه ومبيته
المثل قد قال كلب القوم لو يكثر نباحه=مايضر الماطر اللي في سما ربك لقيته

عندك استعداد تنزل في ميادين الوقاحه =كان ودك بالشرا والبيع ناحر للبهيته
قايد الكنكورد مطلق وانت ما تملك وشاحه=ما انت قايد يا طويل العمر غير البسكليته

عندي استعداد احول في الميادين المباحه=وعندي استعداد اميّع راس خشمك من فليته
انت لاصاحب سمو ولا مدير ولا سماحه=تشتغل فراش عند اللي يضرك لو عصيته

طحت في كف العذاب اللي ينسيك اي راحه=مار ابا اذكرك بالموضوع يمكنك نسيته
ارجع لوزنك على الساحه وشف حجم الكلاحه=فالمعم اللي لبسته والطريق اللي مشيته

ياجريحٍ من صروف الوقت ماتبرى جراحه=كم سقيمٍ ذاق طعم الموت يوم اني كويته
وزنناوزن الجبال ووجهنا في الفلاحه=والمعم يسرني يوم انت راسك ماغطيته