مات الرجا ضاع الورق جفت اقـلام=وانـا اذكـرك فالثانيـه والدقيـقـه
قل منتظر واقول انـا منتظـر عـام=قل واحشك واقول ويـش الطريقـه؟
شاعرك عزّم يوم رفّت لـه اعـلام=ومْن القـراح وضفتـه بـلّ ريقـه
ناداه ليـل عيونـك وقـال قـداااام=ورّوح يـدوّر فالخـيـال الحقيـقـه
ياللي وصالـك حاسبـه عـدة ايـام=غيبتك خلّت داخل الصـدر ضيقـه!
ان كان قصدك تروي الروح الاوهام=اوهامك اهون من فـراق ٍ مااطيقـه
ولعل قلب ٍ خاف مـن بعـض الآلام=يموت من كثـر الجـروح العميقـه
ينبض بحبك كـل عـرق ٍ وصمّـام=وطيوفك لعيني هي اوفـى صديقـه
لاصرت اطاوع فيـك عـاذل ولـوّام=وراي ابادلـك المشاعـر رقيقـه؟!
لك في ضلوعي شاعر ٍ مابعـد نـام=وان نام هاجـوس القصايـد يفيقـه
أصدق من الدمعه على خدود الايتـام=واحنّ من قلـب الشقيـق لشقيقـه!
يملى زوايا دفتـري شيـح وثمـام=ومن فوق ريضـان الحنايـا بريقـه
وبعض الغلا اللي قسّم المهجه اقسام=مثل السجين اللـي يدينـه طليقـه!
ولو للأمل باب ٍ تجي منـه الاحـلام=مااستوطن الياس بصـدور الخليقـه
والصمت ورد ٍ جف فـتراب الانسام=يوم انسكب عطـر الكـلام ورحيقـه
ياصاحبي عمر الهوى ماانتهـى دام=به عهـد مابيـن الرفيـق ورفيقـه
من جيت لك والأرض في عيني حطام=والشوق ضيّع خطوتي في طريقـه!
وقريت في وجهك ذنوبـي والآثـام=كنك تقول لخاطري ...فـي حريقـه!