راكب اللي صممه شيخ الدنايا = جمس ٍ أبيض من حديثات المودايل
كن تهن فاله معا بعض الحوايا = هرش ٍ أوضح سنته فالدرب حايل
وإن عطاله خط يازين السجايا = يطوي الخدان طيات الزلايل
سايق بيوتي كما سوق المطايا = و الدلال مهيله و الجو هايل
ناصين لي قرم وعلومه دوايا = مزبن المضهود في سم القوايل
لابن هندي يا حلو هاك النبايا = اشهد انه شوق نقاض الجدايل
يابن هندي فيك من هندي حلايا = وهندي الأول شبيهه فالخصايل
اشهد انك ذيب و تقود السرايا = ياشبيه العود كساب الجمايل
كافلن للطيب ما تبغى وصايا = والشجاعه فيك تردع كل عايل
ياعسى راكان يهديك العطايا = وعند سلطان الصعب يصبح سهايل
يالله المعبود يا رب البرايا = ترزقه يالله جزلات الفضايل
قدركم فالقلب في كل الحنايا = والمثايل في رصيد اهل الحمايل
وختامها مني لك احلى التحايا = واحب خشمك ياقوي الفعايل
وصلو على المختار خير البرايا = شفيعنا في يوم كشف الهوايل