الهيـــــــــــــلا *** منتدى قبيلة عتيبة - الحائيه لـ (سلطان بن بدير بن ثعلي العتــيبي)

الحائية النبطية

حرفٍ كتبتــه يا خويّي مهـــــذّب = للصاحب اللي خوّته تسلب الـــــروح
ماني بصايع ما يصدّق يكـــــــــذّب = ماني بضايع هرجته كذب وملــــوح
قلـب تخضّب بالمحبه تخضّــــــب = يا سرع طعنك يا ولد طبّ وجــــروح
الله يجازي من تسبب وسبـــــــــّب = مسموح يا قلبٍ هوى الزين مسمــوح
الله يعين الخاطر اللي تلهـــــــــّـب =على وصوفٍ دونها سحب وسفـــوح
أثر الشعر لاجاك سايب مسيـــّــب = سارح مع الريح الصبية ومســـــروح
يجدل به المزيون جدلة مــــــودّب = ويحضن شعاع الشمس لا لاح به لوح
ثم ان صدر ياشيخ صقلٍ مذهّـــــب = ثم ان حدر ياشيخ ذابح ومذبــــــوح
أثر العيون الواسعات المهـــــــّدب = يصبح بهنّه راجح العقل مرجـــــوح
اليا نعس طرفٍ كحيلٍ تجـــــذّب = قلب الهواوي بآخر الضلع مقـــــروح
وخدٍ تمرّى فيه ناصع مرتـّـــــــب = منحه من المعطي ليا خصّ ممنـــــوح
وجيدٍ تطارد فيه خيل مسكّـــــب = مضمّراتٍ خاصراتٍ لها طمـــــــــوح
خشمٍ عليه الحرّ يرسي مزهّـــــب =حردٍ كما سيفٍ من الهند مصفــــوح
ثم ان ضحك تبرق سنونٌ تصبـّــب =قالوا مطر قلت العذارى لها مــــزوح
أما النحر لاجاك حب محبــــــّب = حبّات خالٍ كانّها الفل مطـــــــروح
يجزع لها طرفٍ صويبٍ مصـــوّب = ويلمع لها بالطرف برقٍ ومملــــــوح
واسفل ترايب دايراتٍٍ مهضّــــب = لا والله ألا صالب العظم مســـــــدوح
من بينهنّه طيب مسك مطيـّــــب = ما هوب في دنياي لو فاح لي فــــوح
وليا تحدّر وصفها قلت هب هب = الزم حدودك باقي الوصف ممــــدوح
مانته بلا زايد وناقص ولا ضـــرب = مانته ولا نقش الزخارف على اللـــــوح
وليا لمس خدٍ لخدٍ تطبــّـــــــــب = كل المواجع زايله عجل وتــــــــروح
كيف العناق اللي يشافي المعــذّب = ياطول ضمّه وانشد الصدر مشـــروح
أنسى شقى دنياي لوهو تركــــّـــب = واسعـد سعاده ماغشاها بكى ونــوح
والله مااهجر حبك اليوم واذهـــــب = لو روّحوني عنك مليون مـــــا اروح
لاهنت مادمت ابا ارقاه مرقـــــــب = مادام في دنياي كادح ومكــــــــدوح
قلبي تولّع بين حب المحبّـــــــب = ياخذ من العليا تباشير وصـــــــروح
يقلب كما طير الهوى ليا تقلّـــــب = ويهوي على صيد الفريسة على الدّوح
له مخلبٍ يغرز ويغرس وينشـــــب = نشبة رماح العز والبيرق يلــــــــــوح
والمعذرة يابنت فالناس تلعــــــــب = ماقدروا قدرك بالسر والبــــــــــــوح
أشغل هوانا خادعات مغـــــــــرّب = دربٍ عوج والله ما فيه مصلــــــــــــوح
ويالله عقب أوصافها لاتعـــــــــذّب = قلبٍ عشق ماردّه جدار وسطــــــــــوح
والله لو بوصف حلى الحور لاتعـب = ويفنى مداد البحر لو موجه يفـــــــوح
يا ذنب فارق لا تصاحبنِ ياذنــب = ولّى زمانك جعل مسكنك مبــــــــروح
يالله ياربّ البرية و يـــــــــارب ّ = ترحم جريح القلب والصوت مبحـوح
اغفر ذنوبٍ غاشياتٍ على القلــــب = تقدر تقول العبد مسموح مسمــــــــوح
واستر غوادر سترها اليوم مطلــــب = في موقفٍ بالحشر فاضح ومفضـــــــوح
نجيّت خلّك جوف نارٍ تقلّــــــــب = أنجيت يونس مثل موسى كما نـــــوح
نجّ الفؤاد اللي يشرّق يغـــــــــرّب = مرة يمين ومرة يسار مسفــــــــــــوح
أنت الوحيد الربّ ترغب وترهــب = سبحانك اللهم سبــوح سبـــــــــــوح
لــ( سلطان بن بدير بن ثعلي العتيبي)

مودتي
:)