سلامي سلام ٍ مثل نفح الرياحين= على اللابه اللي غير عن كل لابه
انا الليله ابغى اللي يعرف القوانين=يميز مابين المزح هو والطلابه

هلا مرحبا ترحيب يسوى ملايين=لعلك تجد في ماتريد الاجابه
بطاقتك من عرعر ومولدك في البحرين=ولهجتك كنك واحد من عتابه

يدوم البقا من وافي ٍ عند وافين= ورجل ٍ تكبر ماحسبنا حسابه
انا وايلي لاجيت ما قيل من وين=بكل المناطق لي مكان ومهابه

ترى الكبر قالو عنه طبع الرديين=لكن انت يبدو قدم عينك ضبابه
لياقلت من وايل نقول الك نعمين=ولو صورتك مع واقعك ماتشابه

لو تدقق النظره على الزين والشين=تميز خطا ماقلت لك من صوابه
انا كيف ابا ارضي ناس ماهم براضين= ترى الرجل يبخص في عروق انتسابه

بلاد المهابه كل مازارها احمر عين=هجم واقتلعها الحر الاشقر بمخلابه
توجهك غربي وانت تسكن جنوب الصين=ولك في بلاد الغرب ناس وقرابه