يا معجب لد يمي واستمع في كلمةٍ عندي=ابا ابديها وانا خابر وسيع العرف يفهمها
غريبة كيف بالمجلس كثيرة جرة الهندي=وانا ماشره على الهندي ولو يخلف معالمها

الا يالمعتصم ياللي تنادي كنك الفندي=تحية دينك المعروف وشبك ماتقدمها
ليامنك نشدت اخذ الجواب الكامل الشندي=احد جانا يعيّش نفس والثاني يعلمها

انادي معجب الضابط انا ما انادي الجندي=اقدمها بدون شكوك يا معجب واعممها
كفو كفو وانا خابرك تشب النار بالزندي=وصحيح اللي تقوله مير ياليته ينظمها

تناديني وانا حولك مارحت الهند والسندي=علامك ياوسيع العرف نفسك قمت تظلمها
والا ياصاحبي لابد من تطوير فالبندي=عشان اللي فشل من بين هالعمال نحرمها

تجر عواك يا ذيبٍ على المشراف معلندي=تجره من غضب يا ذيب والا من تأزمها
وترى من يفعل الطيب نبا نجزيه بالرندي=تبين يا عميلي سالفتنا صعب تفهمها

صحيبي غير اللهجه واضنه صار هولندي=نسى انه بين ربعه كلمته منهو يترجمها
اجل خل السوالف كلها في حفرة المندي=وزينلك معاريضٍ جديده ثم قدمها