أعاهدك واعطيك عهدي بتثبيت=ما انساك كاتبها لكم في وصاتي
جاني خيالك في منامي وفزيت=وناديت باعلى الصوت وينك غناتي
من لهفتي من فرحتي يوم ناديت=كنت احسب انك سامعٍ في نداتي
اضحك على نفسي واقول اني اوحيت=صوته يجاوبني ويسمع حداتي
وآخذ واكررها واقول آه ياليت=ياليت اشوفك قبل وقت المماتي
يا خل ليه ابعدت عني وصديت=ما تدري ابعادك يعجّل وفاتي
ياما على شانك نصحت وترجيت=وياما من اسبابك سمعت الشماتي
وياما على شانك دعيت وتمنيت=وياما من اسبابك قطعت الصلاتي
سيف الهجر يا صاحبي ليه سليت=واحرمتني بالهجر كل امنياتي
وقطعت حبل الوصل يا شوق وانهيت=كل العلاقه قبل تسمع شكاتي
جاوب وعلمني انا ويش سويت=ارجوك علمني انا وش خطاتي
هل في وفاي ولهفتي لك تماديت=والا خطاي اني وهبتك حياتي
الشاهد الله فارضٍ حجة البيت=ما انساك لو ولى شبابي وفاتي