ابا انتظر والشوق يحرقني إحراق=وابا استمد الصبر من ذكرياتي
جاني من هموم الزمن فوق ما اطاق =وكتمتها مابين فكري وذاتي
واليوم ابا انشرها على بيض الاوراق=لعل قلبي يستكن ويباتي
هذي ثلاث سنين مايوم له راق=إيصارع الدنيا بصبر وثباتي
يومٍ يهز الجسم من كل الاعماق= ويومٍ غريق ودوب حبل النجاتي
وانا معه ما افيق ياكود لافاق= وان غاب غبت وصفقوا ياعداتي
جمعت لوجيه الرياجيل ما لاق =مايطلق حجاجي ويكرم رفاتي
وحطيت دون الدون قفلٍ ومغلاق=وسكرت دربه من جميع الجهاتي
ودرب الخطى قصرت من دونه الساق=والحمد لله مجتهد في صلاتي
ولا امد كف الستر ادور إنفاق =لو كان في مدّت كفوفي غناتي
امنت بالرحمن قسام الارزاق=واللي كتبه الله على النفس ياتي
ياما كتمت الضيق والقلب خفاق=احاول اجمع مابقى من شتاتي
واقول متى الصبح ياشمس الاشراق=ومتى تعانق بسمتي مع شفاتي
ووناستي إليا ذكر ضوح براق =على ديارٍ شوفها هو مناتي
يارب ترزقها من الوسم غداق =عامين ماتابس غصون النباتي
وعامين مع عامين والخير من ساق=ولاعاد يوجد مستحق الزكاتي
من فضل من فضله على الناس سباق=اللي خلق وابدع حسين الصفاتي
اللي سلب فكري ولا بل الارماق=واقفا بعد ورد سهوم المماتي
يامستبيح السهر والسهر سراق= يسرق من الجفنين حلو السباتي
وراك ما بادلتني حر الاشواق=وأكملت معي الدرب لاخر حياتي
بالله عود وانشد الصدر لاضاق= وش سبة الضيقه وسبة شكاتي
واجاوبك واقول طيرٍ بمسباق=والطير حر وجودوه الرعاتي
لاهم يفكونه ويفرح بالاعتاق=ولا برقعوا عينه عن الحايماتي
لكن على الله يازمن حب وفراق=بعثرتنا والشوق بالحيل عاتيِِِِِِِِِِِِِِِ