يامرحبا يابندر اقلط بين نار وبين غـار=في ساعةً يدعابها والله يعين الصابرين
اسمك حقيقي فالبطاقه مير طبعك مستعار=مدري وش الي غيرك يومً ربعك طيبين

دام البقـاء لكـنّ يـارجـال لاتـخـط المـسـار=حاسب على روحـك تـرا قدمـك جبـالاً ماتليـن
اسمي وطبعي مع رجال الطيـب يلقـى لـه وقـار=واللي على راسه بلاء.. يتحسسه ويقول:- وين؟!!

بعض الجبال ان جيتها صارت على البيداء غبار=وانشد هل المرقاب وافهـم بالاشـاره ياذهيـن
لو ننشد الصحاف قال الجيش صامـد فالمطـار=والجيش خاين من قبل مير الصحافـه كاذبيـن

نشدتهم قالوا علوم كبار وان جاء الجد نار=ما يلحقه صاروخ توما هوك لاعد أميتيـن
ما للعلوم اللي تلفقهـا.. هنـا أي اعتبـار=الأرض تحمل مايطيح من السماء والله يعين

عز الله اعطوك الحقيقه كل ابوها باختصار=نارً على راع الرداء واعاف درب الخايبين
ماقد سمعت بمثلها وسط الصحاري والديار=فعلة قليل العرف يوم ان النشاما غايبيـن

ياجعلها تفداك هاذيك الصفـة يالمستشـار=والترجمة محفوظـةٍ بحقوقهـا للناشريـن
بعض الوجيه السود ما والله يغطيها الخمار=مالي شرف في خوة اللي مالهم مذهب ودين

الليل يستر ماحصل مير الفضيحـه فالنهـار=لو جاء من المخطي عذر يمكن نعود سامحين
خل الكديش يعيش واشتل مابقى فوق القطار=ابوي وصاني وقال ارحم ضعيف المعتديـن

العود يـاراع السوالـف مايحالـي للزقـار=والعضو لا منه فسد آآكيد الـه مستأصليـن
لا تطري الرحمة يابن حرباش كان الك اقتدار=نبا نفتش سيرةٍ ماهـي ريـاض الصالحيـن

راع السوالف خابره مير انتبـه للانحـدار=ماودي افرح كـل غـدارً وشمـاتً لعيـن
ولاودي اقتل موهبه واسرع بتصدير القرار=وش عاد لاصارت من اربوعن لنا وقريبين

البادي اظلم ...من تحداني سريع الانتحار=لاكن دحدر مع كرا وإلا بعد سفط يميـن
الشعر لا منه سقط ماعاد اله ياهيه كـار=رافع مقامي مع هل الإبداع والذوق الثمين

الله الله لاهنتوا

يابندر وياعفاس
صحت السنتكم ياخوالي ماقصرتوا المحاوره وافيه وكافيه ولاهي غريبه منكم والله يعطيكم العافيه وننتظر القادم