يالله بغيـمٍ تقـادح لمعـت بـروقـه= ريـح الشمالـي يهـب ولا يفرقهـا
وقت الوسم مستمـرٍ بامـرك تسوقـه= يهل مزنـه علـى الريضـان دفقهـا
تمشي سيوله مع الشعبـان وعروقـه= يملا الخباري مـع الغـدران يغرقهـا
تاخذ لـك أيـام كـلٍ سايـقٍ نوقـه= ينصون قـاعٍ تبشـر عـن حقايقهـا
البـدو واللـي يعـد البـر معشوقـه= ما يصبر وطلعـت البـرّان يعشقهـا
يفرح مع العشب يطفي بشوفته شوقـه= ينس همـومٍ تهـاوت فـي دقايقهـا
احب انا العشب وريح الورد ونشوقـه= ومشاهد الشمـس مغربهـا ومشرقهـا
الله على القاع بين العشـب مشقوقـه= تلقى الزبيدي على البطحـاء وتنتقهـا
والروض الاخضر يسر وماحلا رموقه= وبيت الشعر والذبيحـه مـن تعلقهـا
واحب ربع ٍ نشاما مـا بهـم عوقـه= والبن الاشقر على المحماس يحرقهـا
وصوت النجر يجذب اللافين بطروقه= ياكن دقه علـى الضلعـان يصفقهـا
واحب الارطا ونار جـروم محروقـه= وفنجال مـن دلـة مـا مـل ذايقهـا
ياماحلا الحر الاشقر تطلـق سبوقـه= لا شاف زول الحباري قـام يلحقهـا
كلما ضرب له حباره يرتفـع سوقـه= لجواد تفـرح بصيـده يـوم وفقهـا
انا اعرف اللي يداوي القلب وفتوقـه= فرقا المدينـه وبعـدٍ عـن خلايقهـا
يالايمي لـو تـروح البـر وتذوقـه= اضن رجلي علـى الصمـان تسبقهـا