سلام الله على اللي يردون السلامي=ورده فرض والا البدايه فيه سنه
انا اللي يحترمني يبي يلقى احترامي=ولا للناس فضل ٍ ولا للناس منه

هلا يامرحبا من رفيعين المقامي = تردّه ياهلا ,, ياهلابك لو تكنّه
محد حقّرك يانور جلّاي الظلامي = تفضل واشرب الكيف هيله فوق بنّه

بقا والطيب مسك البدايه والختامي= وفن الطيب لاعاش من يجهل بفنه
من اللي قال عندي شكوك(ن) في مقامي=اوضح علم وابليس لايغويك ظنه

ابكتبلي رساله وابعطيها الحمامي = وفيها الفرق بين الجحيم وبين جنّه
صحيح اللي يقابل عتيبه مايلامي = ياطيب اللي سلم عين والا طاح سنّه

ليا جتنا الرساله لها رد ٍ تمامي=تبي تضحك ومن عقبها تجتر ونه
ونعم ٍ بك وربعك ليا ثار العسامي=ولكن لو تدن الجرس حنا ندنه

توصّلها لربعك وانا حامي كلامي = وصوت الشيخ لامن قراها فيه خنّه
رفيع المنزله لاتروحبك الحلامي = حصاني قدم عينك عسى تقدر تعنّه

لاتقرب للحمى والحمى يحميه حامي= نصيحه وانت رجل ٍ تمن اللي تمنه
انا صاحي واعرف الحلال من الحرامي=والى حان الوعد تطعنك روس الاسنه

نعرف القوم ,, والقوم تعرف بالاسامي = كتبت القاف واقول يارجّال غنّه
بعد طقّيت وشلون مانفك اللحامي = ولو ساقط هل البنز فالمشوار دنّه