ياسلام الله سلام(ن) كما طب الطبيب = يبري العله ويكوي عطيب جروحها
من يناقش صاحب الفكر والعقل اللبيب = في خلاصتها يفيح العطر من فوحها

مرحبا يالشاعر اللي تسلم خذ وجيب=والبيوت اللي على ساس تبقى صروحها
تطلع الزبده ليا قمت خضيت الحليب=ياتخاو الناس والا تروح بروحها

البقا بك يالمرحب وزيد الطيب طيب = جيت في نجد العذيه وشوف اطروحها
من يشوف اطروح نجد العذيه مايطيب= تشرق وتنشر بالافاق ساطع ضوحها

يالعتيبي مابكم عندنا شك ٍ وريب=ضيق افاق الحكي لاتزيد فتوحها
انت ترمي بس مدري تصيب ولاتصيب=الوكاد افتح عيونك ومد شبوحها

طيبنا نكسي البعيدين منه والقريب = جيت بالقمه وبيض الحمام بدوحها
مانشوف الا السماء عادة(ن) ماهي بعيب = لا اختلط في الارض جد البشر ومزوحها

مانقول الا وفيين والخايب يخيب=مار انا من نسل قوم ٍ كبير طموحها
ماتشوف الا السما ماتحوش الا النصيب=غير كان بوسط قلبك سوالف بوحها