انا ليا هوجست من نشفت الريق=سجيت رجلي فالدروب الصعيبه
وعديت في روس الجبال الشواهيق=واشغلت فكري بالحياه العصيبه
ولديت فالعالم وشفت التوافيق=اشوف كلن محتمي مع صحيبه
حتى الضعيف الي من افعالنا سيق=اليوم يفخر في مزايا قريبه
حتى لو انه لفق الهرج تلفيق=اهم شي اسم القرابه يجيبه
مطفوق ويباهي فمدح المطافيق=ومقربٍ من كل شكه وريبه
ولديت في ربعي بنظره وتدقيق=وليا الشهامه فالنشاما وهيبه
اشوف لي قومٍ تسد المغاليق=وفيهم على الطالات صحوه غريبه
وعزمت في مدح الرجال المطاليق=الي على فعل المراجل تعيبه
اهل الكرم والجود واهل المواثيق=واهل القنا واهل السيوف الصلبيه
الي فعايلهم على القمه تويق=ومن الصطر فيهم صقاره عجيبه
وفزعاتهم مثل المزون المصاديق=ان كان كلن قام يفخر بطيبه
عز الخوي ليا نخاهم من الضيق=وزبن الدخيل اليا تردى نصيبه
اليا ذكرت افعالهم دار تحقيق=من بيني وبين الحياه الكئيبه
واضهرت من شعري جزيل الطورايق=وامرضت به كل الوجيه الغضيبه
الي تجاهل مجد مابه تباريق=علمتهم معنى النصر والغليبه
والي تنشد والغبن فالمعاليق=دليتهم طب الجريح وطبيبه
ياناشدن عنا ترانا الزراريق=عيال روق وعزنا في عتيبه
الله عطانا العز بين المخاليق=وهاذي على اهل العرف ماهي غريبه
تاريخنا ثابت كما النير وطويق=وسهومنا يوم الحرايب عطيبه
احرار مانعرف شباك المسابيق=ولاقد دفعنا لجل نبقى ضريبه
تشهد لنا الحره كلامٍ بتوثيق=دار الرجال الي حموها غصيبه
منزحين الخصم من دون تبريق=ومفرقين جموع قومٍ حريبه
يوم العرب مالوا وراحوا تفاريق=حنا ثبتنا فالديار المهيبه
ماهمنا فالوقت كنز الصناديق= هاذي مرابي للجدود العريبه

المشاركة الأصلية كتبت بواسطة محب الهيلا (المشاركة 607401) صح لسانك والنعم والفين نعم بالزراريق يعطيك العافية

المشاركة الأصلية كتبت بواسطة ناصر عتيبه (المشاركة 607840) ونعم والله في الآد زراق وفي عتابه كلها

المشاركة الأصلية كتبت بواسطة صنداح الزلامي (المشاركة 607846) ابراهيم بن خلف الزراقي صح لسانك عدد كل حرف كتبت وبيض الله وجهك قصيدة فخر واعتزاز في ربعك وعيال عمك وهذا واجب عليك كشاعر كما نفخر بأسم ذوي زراق ونقول ونعم فهم لله درك على هذه القصيدة ........ تقبل فائق احترامي