سلطان شاعر معتبر مايجهل سلوم العرب = يحسب حساب الكلمه اللي حاسبين احسابها
اللي قراها ماكتب .. واللي سمعها ماخطب = يانعنبوها لحية ٍ ماتحتمي باشنابها

قبلان ياقبلان سيرها على حكمه وادب =دامك عرفت المشكله حاول تعرف اسبابها
مادامها بين الدقن ياطير شلوى والشنب =علّي سندها تراني سترها وحجابها

يلي توصي بالذهب .. جوّد قناطير الذهب =والمشكله لاجاتنا نقفل عليها بابها
اللي لفى يعني وصل .. واللي رحل يعني ذهب = هذي ياسلطان الجذع جمله عليك اعرابها

قدمي جزيلات المعاني تعترض مثل الشبب= لابد مانرضيك وانت الطيبه ترضابها
للي وصل واللي رحل ..مافيه شئ بلا سبب=واللي تغيب عن الوعد معها العذر بغيابها

سوق التداول بالنسب يرفع نسب يرخي نسب = والتوصيه فالسوق عندي صاحبك وادرابها
العذر ماينفع ليا شفت الدما لين الركب = والعين عينك يالجذع لوّك نتفت اهدابها

سوق التداول بالنسب واحدٍ خسر واحدٍ كسب =واليا ذكرت الاوله عندي وانا كسابها
ياصاحبي ياصاحبي مالي عليك الا العتب =حكم ضميرك لاتشب النار ياشبابها

الاوله وقت الطلب .. والثانيه نار وحطب = والثالثه عند الذياب اللي تحد انيابها
يال العجب من كلمتك يابو لهب يال العجب = ذميت ابا القاسم بكلمه .. وانشده وش جابها