ياحياتي لاتعاين في بعيون العتاب=قوللي وش جاك مني يوم بعتابك تلد
قوللي وش جاك مني وانتظر رد الجواب=ظنتي ماجاك مني غير حبن ما وجد
ظنتي مافيه قلبن مثل قلبي فيك ذاب=وظنتي مافيه غيري من عتابك في نكد
لاكن العذال منا صابهم كثر أكتئاب=حاولوا قدر أستطاعتهم يخلونك تصد
لين وصَلت مفترق طرقن تودي للخراب=وانته مصدق كلام أهل المصالح والحسد
لين شكيت إني اخونك وجاء فيك أرتياب=والحقيقه كيف أخونك وانت عمري واللحد
مير لن كانك تبي درب المفارق والغياب=شكوتي لله وحده ربي الفرد الصمد
إبتدا هم السنين الي خفوقي به مصاب=وأنتهى حلم الزمان الي حلمته فالمهد
حلمي الي من صغر سني غدا كنه سراب =كل ماقربت صوبه راح عني وابتعد
وزرعي الي زارعه تحت المخايل والسحاب=يوم قام وشفت ثمره غيري لثمره حصد
وحظي المنحوس مثل الي كبر سنه وشاب=طول عمري مالقيته عن حياتي مبتعد
طول عمري اسأل العربان عنه كيف غاب= يوم حصلته وجيته كان واقف ثم قعد
وده يعاند وأنا توي وسط سن الشباب=وعذره انه قال شايب كيف ياقف للولد
بس لن كانك معزم ياحياتي للذهاب= خذ حياتي ياحياتي ما أبيها للأبد
والله ان الموت خير من التعني والعذاب=وخير من دنيا بعد فرقاك مافيها احد
والوعد بيني وبينك يالغضي يوم الحساب=والا هالدنيا ماظني باقيٍ فيها وعد

المشاركة الأصلية كتبت بواسطة عبدالله الجـــذع (المشاركة 587272) الله.. صح لسانك يالغالي.. لافض فوك .. ودمت مبدعا يالجزل..

المشاركة الأصلية كتبت بواسطة شامان الاسعدي (المشاركة 587380) ابراهيم الزراقي صح السانك واعتلا شانك ابداع ولا اروع مشكوووووور والله يعطيف الف عافيه

إبتدا هم السنين الي خفوقي بـه مصـاب=وأنتهى حلم الزمان الـي حلمتـه فالمهـد
حلمي الي من صغر سني غدا كنه سـراب=كل ماقربـت صوبـه راح عنـي وابتعـد

المشاركة الأصلية كتبت بواسطة محمد بن رشيد (المشاركة 588999) الله الله إبتدا هم السنين الي خفوقي بـه مصـاب=وأنتهى حلم الزمان الـي حلمتـه فالمهـد حلمي الي من صغر سني غدا كنه سـراب=كل ماقربـت صوبـه راح عنـي وابتعـد ابداااااااااااااع لاهنت يبو خلف تقديري