لابكر الوسمي معه برق وارعاد=والسيل غطا وانبتن الزواهير
يزين سوق اللي غواربهن اسناد=في مرتع فيه الزهر والنواوير
ام الجنوب اللي تطافح وترتاد=وام الرقاب اللي سوات المشاهير
وام السنام اللي كما الضلع موتاد=وام الحليب اللي منه تجلب الخير
فج النحور اللي علاهن الأنداد=راحو ضحايا للسيوف البواتير
حمر لبوجاسم تطاوع وتنقاد=وعفرا مع مالك تسر النواظير
البل عطايا الله لنا ذخر واسناد=ياما غدا من دونهنه طوابير
ياما غدا باسبابهن روس واسياد=وياما غدا باسبابهن شيخ وامير
وياما غدا باسبابهن واوخذ اشداد =قدام لاتبنى ديار المناعير
البل عظام المال والقول مسناد=من قولٍ يقوله زعيم الشواعير
تمت وصلى الله على الصادق الهاد=اعداد وبال المزون الشخاتير