ياسلام الله سلامن منهجه دنيا ودينا = سايقه قبل الطلب حسب العوايد ياسلامي
يابن فالح لو تقرا في رياض الصالحينا = كان تيقن بالمطيه يوم تذعن للخطامي

مرحبا بالعازمي والعازمي منّا و فينا=الرفيق اللي منوّل منزله قاعة نعامي
احمد الله وأشكره من فضل ربّ العالمينا=مكتفي من كل علم ومدركن غاية مرامي

لاتعلمنّا وحنا في علومك خابرينا = خِِيل براق الحيا فالشرق والا لاح شامي
كبتن الهيلو شلعها مع دروب الغانمينا = لكن الملاح فالغرفه مسوّيله زحامي

وانت عنك وعن علومك والله انّا ما درينا=الهبوب تهبّ وتزيل الطخافه والغمامي
كبتن الهيلوو يعدّ من الرجال الطيبينا=ماش مثله زول لو يسلم من عيال الحرامي

ياجماعه كنت اعدّه من معاوين السنينا = مار غرنّه ليال العافيه والدم حامي
كل قاسي في زمان العولمه لازم يلينا = والحديده لاطرقناها يفارقها اللحامي