هاض الظمير اللي يجر التفاكير = يوم أستوت لة فكرتة مافهقها
يجرها جر الرشا من على البير = يوم أعتلق بأقصى المحالة شنقها
وأنزم حبله وأقطعتة الشناتير = يوم المحالة في حبالة نتقها
دلوه قصير وعقبوه المصادير = في نقرتن قفرن تحترش سلقها
في خايعن فيه الذيابة محادير = ماكن فيه الناس ربي خلقها
ماحولة الا صوت شهب الزرازير = وسود الجبال اللي صداها صهقها
من العطش كبدة على صالي الكير = زفيرها متخالطن مع شهقها
ورجليه من حر الرمض شلها السير = تعرق على اليبدا وينشف عرقها
وضاعت علومة وأخلفوه المداوير = اللي عقب ماصدر الماء لحقها
وأمسى علية الليل من غير تيسير = يتنى تباشير الولي لاوثقها
عطشن معاليقة .. عيونة مساهير = ويديه ماداوى زهابة شققها
وقاموا على شفة تدور المناعير = كلن يقول أن شاشت الخيل سقها
فوق الاصايل روحوا حزة عصير = تترز محازمها الوسيعة تفقها
وتفرقوا بأمر العويدي زنيهير = من يوم كلمة دورولة نطقها
أحدن شمال القوع غربن من الدير = وأحدن جنوب الجمع يدرق درقها
وجابوة من فوق النعش بالتحاسير = عادت لهم دنيا الحسايف محقها
وأستقبلوه الجمع رعيان وأمير = والصبح عدوا للجنازة خرقها
وصلوا على الجثمان بآيات تذكير = قبل مغيب الشمس يبدي شفقها
وحطوه في قبرن عساه الشخاتير = من مزنتن تحيي الشجر مع ورقها
وأنا سبايب حب سيد الغنادير = اللي عن الخفرات ربي فرقها
قامت على نفسي همومي طوابير = ومرن سبا عوج الضلوع وفتقها
وسقمن ليا جاني تجيني حواشير = لولا الدعاوي كان روحي خنقها
أضيق لة وأنوح وأحن وأغير = وأشفق وتاني خطوتة لاطرقها
لاشفت زولة شفت بيض التباشير = وأن راح روحي من ضلوعي سرقها
والعين في طرياه تاخذ مشاوير = يسحب نظرها والجفون يحرقها
عيني معي لاشك نظراتها غير = حتى على حلو الكرا ماعتقها
تبغى المنام ولا بغته المقادير = طاريه لو تسبق مجية سبقها
يلعب بها لعب الورق في المعاصير = وأن غمضت بتلا الطواري صفقها
وأن قلت ياعين الشقى عييني خير = كني على سقم العنا مغتبقها
هذة سنة وأنا أنشد الناس وأشير = وأصارع بحور الزمن وأحدقها
ولاخذت مطلوبي ولانلت تفسير = ولاذقت ميرادي ولاقال ذقها
دنيا(ن) خسرت بها كثير المخاسير = رشت على ريح السعادة صنقها
ومن خانتة دنياه شاف التعازير = تصبح على رجواه طرما وصقها
يشيب في عزة وهو توه صغير = لو عارض اللحية بموسة حلقها
منها فنا العباس وكليب والزير = والعامري يومن ليلى عشقها
والامر عند اللة حسين التدابير = اللي جميع الخلق بأمرة رزقها

الغالي شبيب


صح السانك


لله درك ابداع وامتاع



كل الود لك.......