الله على اللي قيمته ربع مليون =جيب ٍ جديد من الجيوب الجديده
غالي ويستاهل على مايقولون=وهذي السنه يمكن وكيله يزيده
من وارد اليابان منتج ومامون=واليوم شايف صورته فالجريده
ابداع فالتصميم والشكل واللون=فريد نوعه والمزايا فريده
شاشه وكاميرات مثل التلفزون=تكشف لسواقه مزايا عديده
وامثبته علامته فالدركسون= تشبه لدوار ٍ بمدخل بريده
حرف ال يعني جيب لكزس ومضمون= مايشتريه اللي قليل ٍ رصيده
هو منوة اللي للفخامه يعشقون=وناوين به طوي الفيافي البعيده
والا ليا شافوا لهم برق ومزون=وعن الحيا جاهم علوم ٍ اكيده
وتواعدوا على السفر بالتليفون= ومن طيبهم دايم والارياء سديده
عن ضيقة الخاطر ليالي يسجون=وكلن مجهز للمسافه قصيده
ايقصرون البعد بطروق ولحون=واللي يغني البيت واللي يعيده
اما على طرق ٍمغنيه ابن عون=والا لبن جدلان راعي النشيده
هذي طراة العمر ياللي تمنون=وكم واحد ٍهذي مناته وعيده
وباقي الحياه احلام وامال وضنون=وانا اعتبرها اعراب جمله مفيده
دنياً تناطحنا بلا راس وقرون=وحنَا نقابلها بروس ٍ عنيده
احد ٍ يصارعها من الالف للنون= واحد ٍ مقيدته واحد فك قيده
دام الاجل مكتوب فالرزق مضمون=والادمي قانص والارزاق صيده
والناس لو يبنون والا يهدون = ماقاوموا صفق الرياح الشديده
ولو للردي مال ٍ مثل مال قارون=روحه ماهي من ثروته مستفيده
ان مات مات بذل وان عاش مغبون=لاموت عز ولا حياة ٍ سعيده
واهل العقول الواعيه مايغرون = ويجهل بها اصحاب العقول البليده
يالله هونها على القلب وتهون= ياخالق ٍ خلقه ورازق عبيده
صار ال زبيده راي في عهد هارون = ولولا الخليفه وش تعود زبيده
ولو مصر ماتحزن على موت فرعون = مالوّح السادات للشعب بيده