يا رجم عديتـك وعدابـي البيـن =والقلب في راسـك تبيّـح كنينـه
الله لا يسقـي مفاليـك عاميـن =ذكرتني براعي الطباع الحسينـه
مرحوم يا اللي جهزوا يوم الأثنين =العصر من فوق النعش شايلينـه
حطوا على خلي من الطين زافين =حطوا عليـه اللبـن وملحدينـه
يا ليت كفي حدر خده عن الطيـن =والكف الآخر فوق صافي جبينـه
أو ليت يومي قبل يومه بيوميـن =ولا المرض ما بيننـا قاسمينـه
لا يا حياة الشر عقب أريش العين =لا وهنـي مـن شافنـا تابعينـه
قالوا علامك عشرك اليوم ثنتيـن =قلت اعذروني زين الأطباع وينـه
قالوا تخيّـر بالبنـات المزاييـن =قلت كل العذارى غيرها منكرينـه
قالوا عجوز وقلت وافالكم شيـن =الخمس والعشرين قيمـة سنينـه
وجدي عليها وجد راعي بعاريـن =أمسى خلاوي والسرق حايفينـه
هن راس ماله واشلعوهن شياطين =وأصبح على الجرة يفرك يدينـه
أو وجد من لحقوه طلابة الديـن =صكت عمـي القايلـه لاحقينـه
لحقوه عصمان الشوارب مغنييـن =وتشاوحوه بكـل شلفـا سنينـه