يا راكب الله نازح البعد يطويه = طي الرشاء من فوق جال المحاله
لكزس على كيفي وشفي منقّيه = آخر موديل وكل شيٍ وكاله
لو آصفه ما عطيه حقه ولا أوفيه = بس الاكيد ان احسن الوصف ناله
فل ابشن ولا له حليّن يحاليه = كامل ولله الثناء والكماله
من معرض الانجاز بالكاش جانيه = مافيه لا فهقه ولا بالحواله
بربع مليون وثلاثين شاريه = هذاه غير السمسره والدلاله
ابيه في دربٍ ينومس وحاسيه = وفي غير هذا الدرب ابلقى بداله
فوقه عتيبيٍ عريبٍ مجانيه = مرددٍ من راس عمّه وخاله
في المرجله والطيب محدٍ يناحيه = والموت عنده مثل شرب البياله
اليا سرا والله يبعد مساريه = دليل غدرا ما يبله دلاله
روّح قبل لا مظلم الليل يمسيه = من الخبر والعصر مكهف اظلاله
يوم استوى في الدرب محدٍ يباريه = من سرعته في الخط كنّه لحاله
وعقب العشاء في وسط جدّه حراويه = يا حي هالمرسول واللي عناله
ملفاه شيخٍ ماكر الطيب حاويه = حاون علوم المرجله والشكاله
أبا العلا شيخٍ نعزّه ونغليه = مانع ولد اعمر ونعم السلاله
كسّاب كلمة نعم لن حل طاريه = بين النشاما كل ما جاء مجاله
تلقاه في قصرٍ رفيعٍ مبانيه = بهل الوفاء مصطك جاله بجاله
في مجلسٍ بابه مشرّع لناصيه = دايم مشرّع قفلته مستحاله
أول قبول الضيف ترحيب يقريه = و وجهن بشوش وصخي يمناً وطاله
وثاني قبول الضيف كبشٍ مسوّيه = مع عودٍ أزرق دايرٍ مع دلاله
وسوالفٍ تبهج مافيها مشاريه = عن العلوم الطيّبه والرجاله
وليا طرى ممشاك وأنته مراكيه = سلّم على خشمه وعطه الرساله
رسالةٍ مضمونها نذرٍ أوفيه = على النقا مافيه شك وجداله
قلّه ترى مانع على اسمه مسمّيه = على العقاب الصيرمي طاب فاله
اسمٍ ينومس وانتشرّف وندعيه = على الحفل وحضور مانع اكماله
وختامها يا مرحبا الله يحييه = يابْوٍ يشرّف واحدٍ من عياله