الغلطه اللي على الأوراق مطبوعه= اللي على الهامشي تطبع مطابعها
مهيب ممنوعه ولاهيب مشروعه=ولا نعرف نهاية الكلمه ومطلعها
غلطات وأثمانها مهيب مدفوعه= لاكن ليت الصحافه ما تشجعها
اللي كتبها فؤاده يدحم ضلوعه= خطر عليها مع جنوبه يطلعها
هو يحسبنه كتب للناس موسوعه= ما يدري أنه يبى السنعه وضيعها
واللي يترجم علوم الغاوي أطبوعه= طبايع الناس غالبتن تطبعها
لو الأفندي عرف كوعه وكرسوعه= ان كان نفسه عن الهفوات طلعها
يا كثر ما بذنا فالصحف من نوعه= و لا تبلش العالم الا من مصدعها
الناس شيماتها هالوقت منزوعه= سلوم الأجداد تال الجيل ضيعها
هبت عليهم رياح الغرب قالوعه= أجتاحت الشرق الأوسط في طلايعها
أرياح من زمرة الكفار مصنوعه= موجهه للعرب حتى تفرقعها
صار العرب بعدها بقلوبهم روعه= والفارس المفترس فعلا مروعها
والمصلحه تالي الأيام مطموعه= موت ظماير بني يعرب طمايعها
كلن على قد مصلحته وموضوعه= الناس من شان مصلحته يصانعها
واللاش صوته رفيع وخط مشفوعه= فرقاعة كل من جاها يفرقعها
يعيش في ديرة بالخيل مرجوعه = تضفي عليها الرفاهيه مدارعها
والقرم كبده بتال الوقت مفلوعه= قست عليه الظروف اللي يقارعها
جاته من الوقت مثنيه ومربوعه= الهم الأدهم فناجيله تجرعها
كمل له اللي بقا لوعه ورى لوعه= في كل ليله وغاراته يبرقعها
ان حط مشروع حاس الوقت مشروعه= والنفس بعض القناعه ما تقنعها
ان كان سل السيوف وصفت جموعه= هجمت صواريخ توماهوك تفجعها
مع العلوم القديمه طايرن شوعه= جداه بعض اللحون اللي يرودعها
والله يا لولا لقول علوم مسموعه= أقول حتى حبال الصوت أقطعها
لو منهل المعرفه ما جف ينبوعه= والمعرفه ما روينا من منابعها
والحق سلطان والرايات مرفوعه= يوم الشريعه مقومتن شرايعها
لاكن ليت الهروج العوج ممنوعه = ومشكلن لجنة تنظر وتردعها