اليوم عبدالله على الجوال مرسل لي كلام=ما يدري إني ساكتٍ من باب تقدير الخوي
ما يدري إني مستواي اليوم غيره قبل عام=ما عاد يقدر معي يمشي فالطريق المستوي

اليوم ياماجد على الشعار والشعر السلام=اقولها واقول حيل الله يابن مشيب قوي
يكفيني اعرف الحلال ولاخلطه هو والحرام=وازيدك من الشعر بيت ان اخر الطب الكوي

أنا تراني ما ألحق الجاهل مشاريه وملام=أشره على العاقل لا شفته في طريقه يلتوي
وأنته تعرف إن إلك عندي قدر يا أخوي ومقام=لكنّ بعض الشئ يجبرني ماني له مهتوي

ماني بجاهل ياذخر جدي عليه بالحرام=عاقل وشاعر فيلسوف وفوقها رجل بدوي
يالي نقلت البندقيه والذخيره والحزام=والله مادري عنك ياماجد ويش انته منتوي

يا فيلسوف / الشعر ماهو بالدراسه والعلام=الشعر صقرٍ من يعرفه ما يخمّه يشتوي
نقلت لي بندق ولا تلقى علي كبر الجرام=والصيده أنهي ذكرها برصاصةٍ تدوي دوي

الواجب انك تقف تعطيني تحيه واحترام=وتارد على الجمه وتشرب لين منها ترتوي
لاتحسب ان السالفه كشتات وقاصة حمام =خايف عليك اطيح من راس الطويله وتهوي

ما أنته بعبدالله ملكنا الوايلي وإبن الإمام=والجمّه اللي قلتها تصلح لمثلك و قروي
أنا حلفت إنّي لأدرّسك أنت وأحرمك المنام=أنا جبل ولا أنت في جنب الزوايا تنزوي

اثره صحيح الطق في الميت يابن مشيب حرام=احذر تزعلني عليك الوي لك ذراعك لوي
وانا حلفت اني لعلمك التقيد بالنظام=حتى تصير انسان متوازن ولنت بفوضوي

ماهو غريب إنك يا عبدالله معي تمشي تمام=حبّوب وأنا أقدّرك وأدفعك دفعٍ معنوي
لكنّ أنا بنشدك عن تالي مشاوير الغرام=وش باقيٍ منها ووش روّح وقل وش تحتوي ؟

بس الغريب انك تعديت الخوال مع العمام=وانت اعرفك صدرك وسيع وعظم سيقانك قوي
الحمدلله من جنوب الدار ناسي لين شام =ماني بمحتاج لذوي والا ذوي والا ذوي