الهيـــــــــــــلا *** منتدى قبيلة عتيبة - دروب العشق للشاعر سلطان الركيبي

" آخر دروب العشق "

يوم بانت مشاعل صدق محلاها
كنها وردةٍ فـ الغيد جوريه

أقبلت والحلا والحسن يزهاها
عنق ريمٍ جفل والعين بحريه

كنها يوم تمشي تسرق خطاها
من مليح الغنج بشويش وشويه

والسبايك على الكتفين غطاها
كنها الليل وسطه شمسنا حيه

ساسها الحسن مدري الحسن مبداها
ملحها " بحر " والنسمات نجديه

يوم مرت خفق قلبي وحياها
واشعلت له رجوم القلب مضويه

كنت هاجر قصيدي لين غناها
واستباحت عزوف القاف حوريه

ما رجعت انظم الدانات لولاها
وارسم آخر دروب العشق بيديه

شفتها من بعيد وصحت محلاها
وردةٍ مع حضور النور جوريه

شعر/ سلطان فيحان الركيبي